Bıylǵy qarashadan bastap elimizde «ámbebap polıtseıler» qyzmet ete bastaıdy - ІІM
ASTANA. 2 mamyr. QazAqparat - Bıylǵy qarashada Іshki ister mınıstrligi el aýmaǵyndaǵy patrýldik jáne jol polıtsııasy áskerı bólinisterin biriktirýdi aıaqtaıdy. Bul týraly búgin ótken baspasóz máslıhatynda QR ІІM resmı ókili Nurdildá Oraz málim etti.
Onyń aıtýynsha, ótken jyldan bastap Іshki ister mınıstrligi Pavlodar oblysy ІІD bazasynda jáne Taraz qalasynda patrýldik jáne jol polıtsııasy áskerı bólinisterin biriktirý boıynsha tájirıbe júrgizdi.
«Esterińizge sala keteıin, sáýir aıynda Taraz qalasynda bolyp ótken ІІM-niń kóshpeli otyrysy birqatar máseleler sapynda atalǵan tájirıbeniń nátıjelerin talqylady. Kollegııada tájirıbeniń oń nátıjeler kórsetkendigi jáne bul tájirıbeni el boıynsha engizý jospary sóz boldy», - dep atap ótti resmı ókil.
N. Orazdyń aıtýynsha, «ámbebap polıtseı» qyzmetin qurý kúzettiń bir baǵytynda jasaqtardyń jarysa qyzmet etýin joıady, kóshede jáne qoǵamdyq oryndarda polıtseılerdiń ornalasý tyǵyzdyǵyn arttyrady, olardyń quqyq buzýshylyqtar jóninde túsken dabyldarǵa den qoıýdaǵy utqyrlyq pen jedeldikti qamtamasyz etedi. Nátıjesinde ákimshilik quqyq buzýshylyqtardy anyqtaý jáne olardyń jolyn kesý, qylmystardy jedel túrde ashý boıynsha polıtsııa jasaqtarynyń jumys nátıjeliligi jaqsarady, bul óz kezeginde, qylmystyń azaıýyna oń yqpalyn tıgizedi.
«Bólinisterdi biriktirý isin aıaqtaý aǵymdaǵy jyldyń qarashasyna josparlanyp otyr. Qazirgi tańda ishki ister organdaryna jańadan ornalasyp jatqan tulǵalarǵa arnalǵan «ámbebap polıtseılerdi» úıretý boıynsha oqý baǵdarlamasy ázirlendi. JOO jáne ІІM bilim berý ortalyqtary bazasynda biriktirý kózdelgen polıtsııanyń áskerı bólinisteri qyzmetkerlerine arnalǵan qaıta daıarlaý kýrstary uıymdastyryldy. Jol jáne patrýldik qyzmet polıtseıleriniń jalpy sany 10 myń shtattyq birlikti quraıdy. Qyzmetterdi biriktirýden keıin olardyń shtattyq sanyn qysqartý josparda joq», - dep túıindedi resmı ókil.
