Bıylǵy qarashada qazaqstandyqtardyń shetel valıýtasyna suranysy artty

ASTANA. QazAqparat – AQSh dollary boıynsha suranys pen usynystyń teńgerimdi bolýyna baılanysty 2022 jylǵy qarashada teńgeniń bırjalyq baǵamy 1 AQSh dollary úshin 458,62–468,90 teńge aralyǵynda ózgerip otyrdy.

Bul týraly QazAqparat QR Ulttyq bankiniń baspasóz qyzmetine silteme jasap habarlaıdy.

Baspasóz málimetterine qaraǵanda, 2022 jylǵy qarashada kvazımemlekettik sektordyń valıýtalyq túsimin satýy (500 mln AQSh dollary) jáne Ulttyq qordan transfertterdi júzege asyrý úshin azdap shetel valıýtasyn konvertatsııalaý (70 mln AQSh dollary) valıýta naryǵyndaǵy usynysqa qoldaý kórsetti. Ulttyq banktiń valıýtalyq ınterventsııalary júrgizilmedi.

Teńge – dollar valıýta juby boıynsha operatsııalardyń jalpy kólemi bir aıda 19,2%-ǵa ulǵaıyp (j/j 17,7%-ǵa tómendeý), onyń ishinde Qazaqstan qor bırjasyndaǵy bırjalyq saýda-sattyq kólemi a/a 20,6%-ǵa ósip, j/j 21,1%-ǵa tómendedi. Halyq tarapynan shetel valıýtasyna suranys artty. 2022 jylǵy qarashada shetel valıýtasyn netto-satyp alý a/a 20,3%-ǵa ósip, 223,5 mlrd teńgeni qurady. Bul rette jyldyq mándegi netto-satyp alýdyń jalpy kólemi aıtarlyqtaı dárejede AQSh dollary men Reseı rýblin netto-satyp alýdyń tómendeýi esebinen 48,2%-ǵa tómendedi.

Shyǵystardyń negizgi kólemi 91,6% nemese 204,6 mlrd teńge – AQSh dollaryn, 1,3% nemese 3,0 mlrd teńge – Reseı rýblin jáne 7,0% nemese 15,6 mlrd teńge – eýrony satyp alýǵa baǵyttaldy. Qarashada Reseı rýbline suranys usynystan sál asyp tústi, al aıyna rýbldi netto-satyp alý 2,3 ese (j/j 30,1) tómendedi.

«Valıýta túrleri boıynsha bólgende AQSh dollaryn netto-satyp alý bir aıda 24,2%-ǵa ósti (tómendeý – j/j 30,8%), eýrony netto-satyp alý 14,6%-ǵa ósti (tómendeý – j/j 3,0 ese)»,-delingen Ulttyq banktiń habarlamasynda.