Bıylǵy qańtar-qyrkúıekte Qazaqstan men Kanada arasyndaǵy ózara saýda kólemi 1,9 mlrd. AQSh dollaryn qurady
ASTANA. 13 qarasha. QazAqparat - Bıylǵy qańtar-qyrkúıekte Qazaqstan men Kanada arasyndaǵy ózara saýda kólemi 1,9 mlrd. AQSh dollaryna jetti. Bul týraly búgin Astanada QR Syrtqy ister mınıstri Erlan Ydyrysov pen Kanada Syrtqy ister mınıstri Djon Berdtiń kezdesýi barysyndaǵy taratylǵan málimetterde habarlanǵan.
Atap aıtqanda bıylǵy toǵyz aıda Qazaqstannan atalǵan elge eksport kólemi 1,7 mlrd. dollarǵa, al Kanadadan ımport 176,8 mln. dollarǵa jetken. Qazaqstannan Kanadaǵa baǵyttalǵan eksporttyń 94 paıyzy munaı jáne munaı ónimderinen turady. Sondaı-aq bul elden Qazaqstanǵa keletin ımport aýyl sharýashylyǵy mashınalary men traktorlardy (27 paıyz), tikushaqtar men ushaqtardy (10 paıyz), kólik quraldaryn (9,1), iri qara maldy (3,6 paıyz) jáne basqa da ónimderdi qamtyp otyr.
Esteńizge sala keteıik, 2012 jyly ekijaqty saýda kólemi 3,3 mlrd. dollardy qurady. Byltyr elimizdiń eksporty 3,08 mlrd. dollar deńgeıinde bolǵan edi.
Búgingi brıfıng barysynda Erlan Ydyrysov eki el arasyndaǵy qarym-qatynasty damytýdyń perspektıvalary zor ekenin aıta kele, Djon Berd myrzanyń Qazaqstanǵa sapary túrli salalardaǵy yntymaqtastyqty nyǵaıtýǵa jańa serpin beretindigine senim artty.
