Bıylǵy Eýrazııa medıa forýmy qalaı ótedi
ASTANA. QazAqparat - Bıylǵy Eýrazııa medıa forýmynyń negizgi otyrystarynyń biri «Eýropalyq odaqtyń evolıýtsııasy» dep atalady. Bul týraly QazAqparat Forýmnyń baspasóz qyzmetine silteme jasap habarlaıdy.
Odaqtyń qazirgi qıyndyqtary men bolashaqtaǵy damý múmkindikteri talqylanady deıdi uıymdastyrýshylar.
Olardyń aıtýynsha, mundaı taqyrypty tańdaý qalypty jaǵdaı. Sebebi, Eýropalyq odaq biregeı. Ol Eýropanyń damýy men turaqtylyǵynyń belgisi bolyp sanalady. Munymen qatar, sońǵy ýaqytta Eýropalyq odaq: bosqyndar jáne qaryzdyq daǵdarys, BREXIT sııaqty ekonomıkalyq jáne saıası máselelermen betpe-bet kelýde. Sondyqtan medıa forýmda Odaqtyń bolashaq úlgisi men sıpaty jan-jaqty qaralady-mys.
Otyrys barysynda, Ulybrıtanııa Syrtqy ister mınıstrliginiń baspasóz hatshysy Saımon Makdjı, VVS telearnasynyń jańalyqtar redaktory Gevın Hıýıtt, halyqaralyq saıasat boıynsha sarapshy, Le Figaro gazetiniń negizin qalaýshy frantsýzdyq Reno Jırar, Eýropa keńesiniń «Sever-ıÝg» ortalyǵynyń basshysy, Italııa parlamentiniń múshesi Debora Bergamını Polsha «Soıýz demokratıcheskıh levyh sıl» (SLD) partııasy tóraǵasynyń orynbasary, Ejı Venderlıh, Media & Strategic Communications Eýropalyq odaq máseleleri boıynsha maman Elı Hadjıeva óziniń sarapshylyq kózqarastaryn bildiredi.
XV Eýrazııalyq medıa forým, «Evolıýtsııanyń 15 jyly: álem qalaı ózgeredi jáne bizdi qalaı ózgertedi» taqyrybymen uıymdastyrylyp otyr. Sondaı-aq, bıylǵy jyly Forýmnyń keńeıtilgen baǵdarlamasy boıynsha: «Halyqaralyq qarym-qatynastar evolıýtsııasy: ǵalamdyq salqyndaý», «Qorshaǵan orta evolıýtsııasy: bultartpas apokalıpsıs nemese jasyl ekonomıkaǵa kóshý», «Qoǵamdaǵy senim evolıýtsııasy: jańa zamanda qoǵamdy qalaı basqarýǵa bolady?», «Faktiden feık-jańalyqtarǵa deıingi aqparattyq tehnologııalar evolıýtsııasy. Alańdaý qajet pe?», «Medıa evolıýtsııasy: blog salasynyń damýy - qater me álde alǵa jyljý ma?», «Adamgershilik pen qundylyqtar evolıýtsııasy: jańa dúnıetanymdy kimder qalyptastyryp otyr?» - degen aýqymdy taqyryptar talqylanatyn bolady.
Aıta keteıik, Eýrazııa medıa forýmy 22-24-shi mamyr aralyǵynda Almaty qalasynda ótedi. Oǵan 60 elden jáne álemniń túkpir-túkpirinen kelgen 500 delegat jınalyp, 50-ge jýyq halyqaralyq jáne qazaqstandyq sarapshylar, memlekettik qaıratkerler, saıasatkerler, BAQ ókilderiniń pikirin tyńdamaqshy.
