Bıylǵy el ekonomıkasynyń ósim boljamy 2,1 paıyzǵa deıin tómendetildi
«Munaı naryǵynda jyl basynan beri munaıdyń Brent markasynyń ortasha baǵasy barreline 98 AQSh dollardy qurady. Bul rette munaı baǵasy boıynsha Dúnıejúzilik qarjy uıymdary 2022 jyly munaı baǵasyn 74 AQSh dollarmen 105 AQSh dollar aralyǵynda boljamdaıdy. Osyǵan baılanysty, makrokórsetkishterdi naqtylaý kezinde munaıdyń ortasha jyldyq baǵasy barreline 90 AQSh dollar deńgeıinde aıqyndaldy. Joǵaryda aıtylǵandardy eskere otyryp, el ekonomıkasynyń ósý boljamy 3,9-dan 2,1 paıyzǵa deıin tómendedi», - dedi ol.
Bul rette mınıstrdiń aıtýynsha, nomınaldy jalpy ishki ónim 91,5 trln teńge kóleminde baǵalanýda. Bul maquldanǵan boljamnan 3,5 trln teńgege joǵary.
«Óńdeýshi ónerkásiptegi boljamdy kórsetkishter álemde protektsıonızmniń kúsheýıýine jáne tarıfterdiń ósýine baılanysty metallýrgııadaǵy óndiriske shekteý qoıý saldarynan 3,5-ten 2,9 paıyzǵa deıin tómendetildi. Qurylysta ósim buryn maquldanǵan deńgeıge sáıkes bolady – 3,8 paıyz. Aqparat pen baılanysta aqparattyq qyzmetterge suranystyń tómendeýi saldarynan boljam 8,3-ten 5 paıyzǵa deıin qysqartyldy», - dedi mınıstr.
