Bıylǵy bıýdjette 3,2 mlrd teńgege 15 DShSK salý qarastyrylǵan - Sport komıteti
Búgin Mádenıet jáne sport mınıstrliginiń keńeıtilgen alqa májilisinde Sport jáne dene shynyqtyrý isteri komıtetiniń tóraǵasy Elsııar Qanaǵatov málim etti.
«Atalǵan qajettilikti qamtamasyz etý úshin kezeń-kezeńimen dene shynyqtyrý-saýyqtyrý keshenderin (DShSK) salý josparlanǵan. Olardyń qurylysy respýblıkalyq jáne oblystyq bıýdjetten qarjylandyrylady (sáıkesinshe, 70% - respýblıkadan, 30% - jergilikti bıýdjetten)»,-dedi komıtet basshysy.
Onyń sózine qaraǵanda, 2014 jylǵy bıýdjette 3 mlrd 287 mln teńgege 15 DShSK salý qarastyrylǵan jáne bul jumystar Respýblıka boıynsha jergilikti atqarýshy organdarmen birigip júrgizilýi kerek.
Buqaralyq sportty damytý maqsatynda sport ınfraqurylymyn damytýǵa erekshe kóńil bólinedi. Vedomstvolyq statıstıkalyq eseptilikke sáıkes, olardyń sany jyl saıyn artyp, qazirgi tańda 34 myń sporttyq ǵımaratqa jetti, onyń 22 myńy aýyldyq jerlerde jumys isteıdi.
