Bıylǵy Boao Azııa forýmy alǵash ret jabyq tsıkl júıesinde ótedi
Jyl saıyn ótetin konferentsııa osy sársenbide ashylyp, úsh kúnge sozylady. Oǵan qatysýshylar oqshaýlanǵan qonaqúılerden BAF konferentsııasy ótetin orynǵa kólikpen jetkiziledi.
«Jabyq tsıkl» rejımi Meılan halyqaralyq áýejaıynan (Haıkoý qalasy, Haınan) bastalady. Qatysýshylar Boao Azııa forýmy ótetin Qytaıdyń ońtústigindegi Haınan provıntsııasyna saparǵa shyqpas buryn PTR testin úsh ret tapsyrý kerek. Sonymen qatar, konferentsııa barysynda koronavırýsqa kún saıyn test tapsyryp otyrýy tıis. Bul protsedýradan ótpegenderge BAF alańdarynda ótetin is-sharalarǵa qatysýǵa tyıym salynady.
Bıylǵy konferentsııa «Álem jáne pandemııa: jahandyq damý jáne ortaq bolashaq úshin ózara qarym-qatynas» uranymen ótedi.
BAF uıymdastyrýshylary forýmnyń oflaın jáne onlaın rejıminde ótetinin málimdedi. Oǵan álemniń túkpir-túkpirinen jınalǵan saıasatkerler men úkimet músheleri, halyqaralyq uıymdardyń basshylary, bedeldi ǵalymdar men saıasattanýshylar, sondaı-aq iri halyqaralyq korporatsııalardyń ókilderi qatysady.
2001 jyly negizi qalanǵan Boao Azııa forýmy – 29 memleket múshe, onyń ishinde Qazaqstan da bastamashy bolǵan halyqaralyq úkimettik emes uıym. Onyń maqsaty – Azııadaǵy aımaqtyq ekonomıkalyq ıntegratsııany qoldaý.
