Bıylǵy birinshi toqsanda Izraıl 50 mln. dollar somasynda Qazaqstan munaıyn ımporttady

ASTANA. QazAqparat - 2016 jyldyń birinshi toqsanynda Izraıl 50 mln. AQSh dollary somasynda qazaqstandyq munaıdy ımporttady. Bul týraly búgin Astanada ótken baspasóz máslıhatynda Qazaqstan Respýblıkasynyń Izraıl memleketindegi Elshisi Dýlat Qýanyshev málim etti.

«2016 jyldyń birinshi toqsanynda Izraıl 50 mln. AQSh dollary somasynda qazaqstandyq munaıdy ımporttady. Meniń oıymsha, bıyl biz ótken jyldyń kórsetkishinen aıtarlyqtaı asyp túsemiz»,-dedi Elshi.

QR SІM málimetine qaraǵanda, Izraıl óz gaz ken oryndaryn ashýy sebepti Qazaqstan munaıynyń ımportyn qysqartty. Bul ekijaqty taýar aınalymy kólemin tómendetti.

«Buǵan deıin qazaqstandyq munaıdy jetkizý kólemi, ıaǵnı 2014 jyly rekordty deńgeıde boldy. Bul kórsetkish aqshalaı mánde 1,4 mlrd. dollardan astam qarjyny qurady»,-dedi D. Qýanyshev.

Onyń sózine qaraǵanda, búginde Izraılge munaı jetkizýshi negizgi elder retinde Reseı, Ázerbaıjan jáne Qazaqstan belgili bolyp otyr.

QR Qarjy mınıstrliginiń málimetinshe, 2016 jyldyń birinshi toqsanynda Izraıl 50,6 mln. dollar somasyna qazaqstandyq munaıdyń 186,9 myń tonnasyn ımporttady. Bul kólem 2015 jyldyń sáıkes kezeńinde Qazaqstannan satyp alǵan munaıdan 8,4 esege artyq.