Bıylǵy bes aıda Jetisý oblysynyń ekonomıkalyq kórsetkishteri artty

TALDYQORǴAN. QazAqparat – Ótken bes aıda Jetisý oblysynyń ekonomıkalyq kórsetkishteri artyp, óndiris, qurylys, saýda sııaqty negizgi salalarda ósim baıqaldy. Bul týraly búgin ortalyq kommýnıkatsııalar qyzmetiniń úılestirýimen Eskeldi aýdanyndaǵy «Taý Jetisý» týrıstik nysany bazasynda ótken brıfıng barysynda aımaq basshysy Beıbit Isabaev aıtty, dep habarlaıdy QazAqparat Jetisý oblysy ákiminiń baspasóz qyzmetine silteme jasap.

Spıkerdiń aıtýynsha, qazir oblys turǵyndarynyń sany 700 myń adamǵa jetken, jer kólemi – 118 myń sharshy shaqyrym.

«Almaty oblysynyń quramynan bólingende óńirimizde ekonomıkanyń qurylymyna, bıýdjet kirisiniń az bóligi qalýyna, taǵy basqa obektıvti faktorlarǵa baılanysty birqatar kórsetkish tómendegen edi. Degenmen, 2022 jyldyń qorytyndysy boıynsha oblysta barlyq negizgi nysanaly ındıkatorlarǵa qol jetkizilip, oblys aımaqtar arasynda tórtinshi kórsetkish kórsetti», - dep atap ótti B. Isabaev.

Máselen, oblysta bıylǵy 5 aıda oń dınamıka arta tústi. Atap aıtqanda, saýda 1,8 esege, respýblıkalyq bıýdjettiń túsimderi – 2,8 esege, qurylys kólemi – 31,3%-ǵa, ónerkásip óndirisi – 14,1%-ǵa ósti. Jalpy óńirlik ónimdegi shaǵyn jáne orta bıznestiń úlesi 39,3%-ǵa jetti (QR – 36,5%). Bıyl oblys bıýdjeti – 486 mlrd teńge, ıaǵnı 16 paıyzǵa ósken.