Bıylǵy «Altyn dombyra» aıtysy Aq Jaıyqta ótedi
ORAL. QazAqparat – Qadyr Myrza Álı atyndaǵy mádenıet jáne óner ortalyǵynyń amfıteatrynda óńirde tuńǵysh ret jekpe-jek aqyndar aıtysy ótti, dep habarlaıdy QazAqparat tilshisi.
Amfıteatrda 1200-den astam kórermen tamashalaǵan biregeı óner keshine tórt aqyn qatysty.
Aıtystyń bul jolǵy ereksheligi, júlde tigilgen joq. Aqyndar ýaqytqa qaramaı, ashyq aspan astynda emin-erkin aıtysty.
Aldymen qyzylordalyq azýly aqyn, eki márte «Altyn dombyra» ıegeri Muhtar Nııazov pen respýblıkalyq aıtystarda júlde alyp, ózin kórsetip úlgergen oraldyq Talǵat Myqı sahnaǵa shyqty. Sóz saıysy barysynda Muhtardyń tegeýrinine Talǵat tótep bere bildi. Muhtar talantty inisin qoldap otyrdy. Arasynda qaıym aıtysqa da kezek berildi.
Atyraýlyq tanymal aıtysker Shalqarbaı Іzbasarov pen jetinshi «Altyn dombyra» ıegeri, batysqazaqstandyq Jansaıa Mýsınanyń tartysy erekshe áser etip, eldi baýrap aldy.
Eń bastysy, aqyndar jeke basqa tıispeı, usaq-túıekke barmaı, alýan-alýan mańyzdy máselelerdi qozǵaı bildi.
Oblystyq mádenıet basqarmasynyń basshysy Qadyrbolat Musaǵalıev Aq Jaıyq óńirinde alǵash ret jekpe-jek aqyndar aıtysyn uıymdastyrǵan Qadyr ortalyǵynyń dırektory Baýyrjan Halıolla men onyń ujymyna rızashylyǵyn bildirdi.
Keshtiń basty qonaǵy bolǵan belgili aqyn, Qazaqstannyń eńbek sińirgen qaıratkeri, halyqaralyq aıtys aqyndary men jyrshy-termeshiler odaǵynyń tóraǵasy Júrsin Erman segizinshi «Altyn dombyra» aıtysynyń bıyl Oralda ótetinin habarlady.
«Meniń kópten izdep júrgenim osyndaı jekpe-jek aıtys edi. Biz aıtysty televızııaǵa laıyqtap, ýaqytyn shektep, biraz buzyp aldyq. Bul joly qazylar alqasy da bolǵan joq. Aqyndardyń eshkim aýzynan qaqqan joq. Olar da eldiń aýzynda júrgen kókeıkesti jaılardy aıta alatynyn taǵy bir dáleldedi. Osy saparymyz barysynda oblys ákimi Ǵalı Esqalıevtiń qabyldaýynda bolyp, segizinshi «Altyn dombyra» aıtysyn Oralda ótkizý týraly usynysymyzdy bildirdik. Óńir basshysy muny qoldady. Endi jyl sońynda elimizdiń eń myqty aqyndary Aq Jaıyqta bas qosatyn bolady», - dedi Júrsin Erman.
