Bıylǵy alty aıda jol-kólik oqıǵalary 47 paıyzǵa artyp, 1167 adam qaza boldy

ASTANA. 25 shilde. QazAqparat - «Jol-kólik oqıǵalarynda zardap shekken adamdar týraly» Memlekettik statıstıkalyq eseptilikke sáıkes,

aǵymdaǵy jyldyń 6 aıy ishinde ótken jyldyń osyndaı kezeńimen salystyrǵanda jol-kólik oqıǵalary 47 paıyzǵa, naqtylasaq 5749-dan 8462-ge artqan. Bul týraly QR Bas prokýratýrasynyń baspasóz qyzmetinen habarlandy.

Atap aıtqanda, ótken 6 aı ishindegi jaǵdaıdyń jalpy kórinisine sáıkes, jol kólik oqıǵalarynda 10 837 adam jaraqat alsa, onyń 6 080-i er adamdar, 4757-i áıelder, bulardyń ishinde 1894-i kámeletke jasqa tolmaǵandar bolyp otyr. Osy kezeń ishinde jol-kólik oqıǵasynan 1167 adam qaza tapty, onyń 828-i er adamdar, 339-y áıelder, al 105-i kámeletke tolmaǵandar.

Al jol oqıǵalarynan zardap shekkenderdiń basym bóligi jolaýshylar bolyp tabylady, olar jalpy japa shekkenderdiń 41 %-yn nemese 4 902 adamdy quraıdy. Japa shekken jaıaý júrginshiler 36%-dy nemese 4 266 adamdy, velosıpedshiler 1 paıyzdy nemese 146 adamdy jáne júk tasýshylar 0,024 paıyzdy nemese 3 adamdy quraǵan. Eger jol-kólik oqıǵalarynyń eń kóp oryn alǵan jerin saralasaq, olardyń basym bóligi, ıaǵnı 6 685 oqıǵa eldi mekenderde jasalyp, olarda 446 adam qaza tapqan. Eldi mekennen tys joldarda 1777 jol-kólik oqıǵalary tirkelse, olarda 707 adam mert bolǵan», - delingen baspasóz baıanynda.