Bıylǵy alty aıda Qazaqstanda ekonomıkalyq ósim 1,7 paıyzdy qurady

ASTANA. QazAqparat - Birinshi jartyljyldyqta Qazaqstanda ekonomıkalyq ósim 1,7 paıyzdy qurady. Bul týraly búgin brıfıngte «Ekonomıkalyq zertteýler ınstıtýty» AQ prezıdenti Maqsat Muqanov málim etti.

«Álemdik ekonomıkada qalyptasyp otyrǵan ahýalda 2015 jyldyń birinshi jartyjyldyǵynda qazaqstandyq ekonomıkanyń ósimi 1,7 paıyzdy qurady. Negizgi kapıtalǵa ınvestıtsııalardyń artýy úrdisi baıqalýda, ıaǵnı bul kórsetkish ótken jyldyń sáıkes kezeńine qaraǵanda 104,4 paıyzǵa jetti. Investıtsııalardyń osyndaı ońtaıly qarqyny Qazaqstannyń ekonomıkalyq ósimine qoldaý bolady»,-dedi ol.

QR Ulttyq ekonomıka mınıstrliginiń málimetinshe, bıylǵy qańtar-maýsymda syrtqy taýar aınalym 39,5 mlrd. dollardy qurap, 2014 jyldyń sáıkes kezeńimen salystyrǵanda 36 paıyzǵa tómendedi. Buǵan Qazaqstannyń negizgi saýda seriktesteri bolyp tabylatyn Reseı men Qytaıda álemdik suranystyń tómendeýi syrtqy saýda qarqynyna keri yqpal etti.

«Osy jaǵdaılarda «100 naqty qadam» Ult josparyn júzege asyrý búgingi ahýalǵa jaýap beretin negizgi maqsat bolyp tabylady. Olar bizdiń ekonomıka úshin problemalar men ózekti mindetterdi is júzinde sheshýge baǵyttalǵan»,-dep qosty M. Muqanov.