Bıylǵy 9 aıynda quqyqqorǵaý organdarynyń para alýyna baılanysty 15 oqıǵa tirkelgen
ASTANA. 15 qarasha. QazAqparat - Aǵymdaǵy jyldyń 9 aıynda quqyqqorǵaý organdarymen para alýdyń, onyń ishinde asa iri kólemde alǵandaryn qosqanda, 15 oqıǵasy oryn aldy. Bul týraly búgin Astanada Bas áskerı prokýror Erǵalı Merzadınovtiń basshylyǵymen vedomstvonyń Qazaqstan Respýblıkasynyń Qarýly Kúshterindegi, basqa áskerleri men áskerı quralymdaryndaǵy zańdylyq pen quqyqtyq tártipti qamtamasyz etý máseleleri boıynsha keńeıtilgen alqa májilisiniń otyrysynda málim boldy, dep habarlaıdy Bas áskerı prokýratýranyń baspasóz qyzmeti.
Bas áskerı prokýrordyń pikirinshe, memlekettik qorǵanys tapsyrysyna jáne áskerdi materıaldyq-tehnıkalyq qamtamasyz etýge jaýapty memlekettik ókiletti organyn qurý qajettiliginiń ýaqyty kelgen.
«Ol, birinshi kezekte, áskerı sharýashylyq júıesindegi sybaılastyqqa jol bermeıdi jáne áskerge joǵary sapaly ónimniń jetkizilýine negizgi tapsyrys berýshi retinde - áskerı bólim komandırleriniń múddeliligin eleýli túrde joǵarylatady», - dep atap ótti E. Merzadınov.
Onyń aıtýynsha, qazirgi kezdegi qamtamasyz etýdiń modeli boıynsha, keıbir komandırler áli de bolsa «kásipkerlerdiń» rolin atqarýda.
Aıta ketý kerek, jıynǵa QR Parlamenti Májilisiniń depýtattary Abaı Tasbolatov jáne Janat Jarasov, «Nur Otan» partııasynyń, Bas áskerı prokýratýranyń janyndaǵy zańdylyqty qamtamasyz etý máseleleri jónindegi Qoǵamdyq Keńestiń ókilderi, quqyqqorǵaý jáne arnaýly organdardyń, áskerı vedomstvolardyń, aımaqtyq basqarmalardyń basshylary, áskerı bólim komandırleri, aımaqtyq jáne garnızondyq áskerı prokýrorlar qatysty.
