Bıylǵy 9 aıdyń ishinde 4,6 mln sharshy metr turǵyn úı salyndy - Óńirlik damý mınıstrligi
ASTANA. 22 qazan. QazAqparat - "Qoljetimdi turǵyn úı - 2020" baǵdarlamasyn iske asyrý negizinde qurylys qarqynynyń ósýi baıqalady.
Bul týraly búgin Úkimet otyrysynda QR Óńirlik damý vıtse-mınıstri Qaıyrbek Óskenbaev málimdedi.
Bıylǵy jyldyń 8 aıynyń qorytyndysy boıynsha turǵyn úıdi paıdalanýǵa berý kólemi ótken jyldan tómen bolsa, 9 aıdyń qorytyndysynda olqylyqtyń orny toltyrylyp, 4,6 mln sharshy metr nemese ótken jyldyń uqsas kezeńine teń kólemde turǵyn úı salynǵan.
«Jyldyq jospardyń 69 % oryndaldy (jospar 6,6 mln sharshy metr). Osy qarqyn bıyl ótken jylǵydan artyq salýǵa jáne 6,8 mln sharshy metr turǵyn úıdi paıdalanýǵa berýge múmkindik týǵyzady», - dedi Q. Óskenbaev.
Onyń málimetinshe, paıdalanýǵa berilgen turǵyn úıdiń 59 %-y nemese 2,7 mln sharshy metri jeke turǵyn úı qurylysynyń úlesine tıesili. Bul ótken jyldyń uqsas kezeńimen salystyrǵanda 12 paıyzǵa artyq. Jalpy respýblıka boıynsha paıdalanýǵa 36864 birlik turǵyn jaı berildi, onyń 18148-i jeke turǵyn úı qurylysy eken. Al memlekettik menshiktegi kásiporyndar men uıymdar 9 aıdyń ishinde 524,9 myń sharshy metr turǵyn úıdi paıdalanýǵa bergen.
