Bıylǵy 9 aıda órtten qansha adam qaza tapqany belgili boldy
ASTANA. QazAqparat - Bıylǵy 9 aıda respýblıkamyzda 11 119 órt oqıǵasy oryn aldy, materıaldyq shyǵyn kólemi 2 mlrd. 372 mln. 994 myń teńgeni qurady. Órtten 242 adam qaza bolyp, 464 adam jaraqat aldy. Mundaı málimetterdi búgin QR ІІM Tótenshe jaǵdaılar komıtetinde «Jylý berý maýsymyndaǵy órt qaýipsizdik sharalary týraly» taqyrybyndaǵy brıfıngte órtke qarsy qyzmet maıory Sáýle Ahmetova keltirdi.
«2013 jylǵy osy kezeńmen salystyrǵanda órt sany 16 paıyzǵa ósti, materıaldyq shyǵyn 22 paıyzǵa, qaza bolǵandar sany 15 paıyzǵa azaıyp, jaraqattanǵandar sany 16 paıyzǵa ósti», - dep atap ótti S. Ahmetova.
Onyń aıtýynsha, órttiń kóp bóligi turǵyn úı sektorynda oryn aldy (7384 órt), ol jalpy órt sanynyń 67 paıyzyn qurap otyr. Bul ótken jyldyń osy kezeńimen salystyrǵanda 18 paıyzǵa kóp.
«Qaza bolǵandardyń 87 paıyzy, ıaǵnı 212 adam osy turǵyn úı sektorynda bolǵan órtterdiń qurbanyna aınaldy», - dedi S. Ahmetova.
