Bıylǵy 9 aıda kólikti mas kúıinde basqarǵandar 593 jol-kólik oqıǵasyn jasady
ASTANA. QazAqparat - Bıyl 726 JKO jaıaý júrginshilerdiń kinásinen boldy. Bul týraly 2014 jyldyń 9 aıyndaǵy Qazaqstan joldaryndaǵy jaǵdaıy týraly QR Bas prokýratýrasy Quqyqtyq statıtıska jáne arnaıy esepke alý jónindegi komıtettiń baspasóz qyzmetinen habarlandy.
«Statıstıka kórsetkendeı, jol apatynyń bolý sebepteri ózgerissiz kúıinde qalyp otyr. Burynǵysha olar kóbinese jol júrý erejelerin óreskel buzatyn júrgizýshilerdiń kinásinen bolyp jatady. Atap aıtqanda, jyldamdyqty arttyrý 4 278 JKO-ǵa sebep bolsa, jaıaý júrginshiler jolaǵynan ótý tártibin buzý - 1 351, qarsy qozǵalys jolaǵyna shyǵý - 992, sondaı-aq kólik quralyn mas kúıinde basqarǵandar 593 jol-kólik oqıǵasyn jasaǵan»,- delingen komıtet málimetinde.
Sonymen qatar, 726 JKO jaıaý júrginshilerdiń joldardyń belgilenbegen bólikterinen ótýi saldarynan bolǵan.
