Bıylǵy 9 aıda ІJÓ 5,7 paıyzdy qurady - Ekonomıka jáne bıýdjettik josparlaý mınıstri
ASTANA. 11 qazan. QazAqparat - Aldyn ala baǵalaýlar boıynsha bıylǵy 9 aıda ІJÓ 5,7 paıyzdy qurady.
Bul týraly búgin Aqordada Elbasy Nursultan Nazarbaevtyń tóraǵalyǵymen ótip jatqan Qazaqstannyń áleýmettik-ekonomıkalyq damýyna arnalǵan Úkimettiń keńeıtilgen otyrysynda QR Ekonomıka jáne bıýdjettik josparlaý mınıstri Erbolat Dosaev málim etti.
«Álemdik ekonomıkadaǵy turaqsyzdyqqa qaramastan, Qazaqstan ekonomıkasy ósiminiń úrdisi saqtalýda. Aldyn ala esepteýler boıynsha bıylǵy 9 aıda ІJÓ ósimi 5,7 paıyzdy qurady. Syrtqy faktorlardyń nasharlaýy jaǵdaıynda elimiz ekonomıkasynyń ósimi qamtamasyz etildi. Bul birinshi kezekte ishki kózderdiń esebinen oryndaldy»,-dedi mınıstr.
Onyń sózine qaraǵanda, ótken jylmen salystyrǵanda el ishinde ınvestıtsııalyq belsendilik jandana tústi. Bıylǵy 9 aıda negizgi kapıtaldaǵy ınvestıtsııa 7,9 paıyzǵa artty. Bul kórsetkish 2009 jylǵy daǵdarystan keıingi eń joǵary ósim bolyp tabylady.
«Úı sharýashylyqtary tarapynan tutyný kóleminiń ósimi baıqalyp otyr»,-dedi E. Dosaev.
Belgili bolǵanyndaı, aǵymdaǵy jylǵy 9 aıda qyzmet kórsetý salasyndaǵy ósim 7,7 paıyzdy qurady.
