Bıylǵy 8 aıda aýyl sharýashylyǵy salasyndaǵy jalpy ónimniń kólemi 756 mıllıard teńgeni qurady
ASTANA. 14 qyrkúıek. QazAqparat - «2011 jyldyń qańtar-tamyz aılarynda aýyl sharýashylyǵy salasyndaǵy jalpy ónimniń kólemi 756 mıllıard teńgeni qurap, 2010 jyldyń sáıkes merzimimen salystyrǵanda 0,1% artty»,-dep habarlaıdy Statıstıka agenttigi.
Agenttik málimetterine qaraǵanda, 2011 jyldyń qańtar-tamyzynda ónerkásip óndirisiniń kólemi qoldanystaǵy baǵalarda 10235 mıllıard teńgeni qurdy. Bul 2010 jyldyń sáıkes merziminen 4,6 paıyzǵa artyq. Sondaı-aq ken óndirý ónerkásibinde jáne karerlerdi qazýda óndiris ósimi - 2,7 paıyzǵa, óńdeý ónerkásibinde - 7,4 paıyzǵa, elektrmen jabdyqtaý, gaz, bý berý jáne aýa baptaýda - 7,2 paıyzǵa, ósken.
Al sýmen jabdyqtaýda, káriz júıesi, qaldyqtardy jınaý jáne bólýdi baqylaý sharalary - 0,8 paıyzǵa tómendedi. Sondaı-aq bıylǵy jyldyń qańtar-tamyzynda júk aınalymynyń kólemi 271 mıllıard tekshe metrdi qurap, 2010 jyldyń sáıkes kezeńinen 15,3 paıyzǵa ósti.
Osy kezeńde bólshek saýda kólemi 2245,4 mıllıard teńgeni qurap, 2010 jyldyń qańtar-tamyzymen salystyrǵanda 13 paıyzǵa ósti. Sondaı-aq kóterme saýda kólemi 6044,6 mıllıard teńgeni qurap, 2010 jyldyń sáıkes kezeńinen 16 paıyzǵa kóp boldy.
