Bıylǵy 7 aıda memlekettik baqylaý zańnamasyn buzǵan 370 laýazym ıeleri jaýapkershilikke tartyldy
ASTANA. QazAqparat - Bas prokýratýranyń Quqyqtyq statıstıka jáne arnaıy esepke alý jónindegi komıtetinde tekserý júrgizýde memlekettik baqylaý jáne qadaǵalaý týraly zańnama talaptarynyń múltiksiz saqtalýyn qadaǵalaýdy qamtamasyz etýge baǵyttalǵan jumystar odan ári jalǵasyn tabýda.
Aǵymdaǵy jyldyń 7 aıynda tirkelgen tekserýlerdiń jalpy sany ótken jyldyń osyndaı kezeńimen salystyrǵanda 9 paıyzǵa óskeni baıqaldy (60 709-dan 66 765-ke).
Sondaı-aq, kásipkerlerdi tekserý sany da 8 paıyzǵa artty (25 855-ten 28 005-ke).
«Bul byltyrǵy jyly shaǵyn jáne orta bızneske jarııalanǵan moratorııdiń aıaqtalýyna baılanysty bolyp otyr.Tekseriletin sýbektilerdiń qyzmetine zańsyz aralasýdan qorǵaý maqsatynda Komıtet 599 (1 053) tekserý taǵaıyndaý aktisin tirkeýden bas tartsa, onyń 299-y (539) jeke kásipkerlerge qatysty bolyp otyr. Sondaı-aq, osy merizim ishinde 434 (238) zańsyz tekserý anyqtalsa, onyń 189-y (96) jeke kásipkerlerge qatysty boldy», - delingen komıtet málimetinde.
Memlekettik organdar bóliginde tekserýdi tirkeýden bas tartýdyń basym bóligi tutynýshylardyń quqyqtaryn qorǵaý(SES) (107), salyq qyzmeti (72), ákimshilik (63), órtke qarsy qyzmet (59), eńbek ınspetsııasy (54) úlesinde.
Atalǵan merzimde memlekettik baqylaý jáne qadaǵalaý týraly zańnamanyń talaptaryn buzǵany úshin qoldanylǵan prokýrorlyq yqpal etý sharalarymen memlekettik organdardyń 370 laýazymdy adamdary zańmen qaralǵan jaýapkershilikterge tartylǵan.
