Bıylǵy 7 aıda «Qoljetimdi turǵyn úı-2020» baǵdarlamasy aıasynda jınaq týraly 53 myń kelisimshart jasaldy
ASTANA. 7 tamyz. QazAqparat - Ústimizdegi jyldyń qańtar-shildesine «Qazaqstan Turǵyn úı qurylys jınaq banki» AQ (QTQJB) salymshylary 52 997 kelisimshart jasasty.
Bul týraly QTQJB basqarýshy dırektory Murat Sháripov málim etti, dep habarlady Primeminister.kz.
«Salymshylar sany jyl saıyn artyp keledi. Bıylǵy 7 aıdyń qorytyndysy boıynsha turǵyn úı qurylys jınaqtary týraly 52 997 kelisim-shart jasalǵan. Jospardy oryndaý deńgeıi116 paıyzdy qurady», - dedi M.Sháripov.
1 tamyzdaǵy málimet boıynsha árekettegi kelisimsharttardyń jalpy sany 319 myńnan asady. Depozıttik baza kólemi 160 mlrd. teńgeden astam qarjyny qurady.
«Menińshe, bul óte jaqsy kórsetkish. 2012 jyldyń sáıkes merzimimen salystyrsaq, ol kezde 44,6 myń kelisimshart jasalǵan bolatyn. Al bıyl 8,5 myńǵa artyq bekitildi. «Qoljetimdi turǵyn úı-2020» baǵdarlamasy iske qosylyp, óziniń alǵashqy nátıjelerin berip jatyr», - dep atap ótti QTQJB basqarýshy dırektory.
Esterińizge sala keteıik, «Qoljetimdi turǵyn úı-2020» baǵdarlamasy sheńberinde turǵyn úı qurylys jınaqtaý júıesin júzege asyratyn «Qazaqstan Turǵyn úı qurylys jınaq banki» Qazaqstandaǵy arnaıy qarjy ınstıtýty bolyp tabylady.
«Qoljetimdi turǵyn úı-2020» baǵdarlamasy QR Prezıdentiniń tapsyrmasymen júzege asyrylýda. Tapsyrmanyń negizgi maqsaty - 2020 jylǵa qaraı jańa turǵyn úıdi jyl saıynǵy paıdalanýǵa berý kólemin 6 mıllıonnan 10 mıllıon sharshy metrge deıin arttyrý.
