Bıylǵy 7 aıda Qazaqstan men Reseı arasyndaǵy taýar aınalymy 3,5% artty

ASTANA. QazAqparat – Bıylǵy 7 aı ishinde Qazaqstan men Reseı arasyndaǵy taýar aınalymy 13,7 mlrd dollarǵa jetti. Al, byltyr dál osy kezeńde eki el arasyndaǵy taýar aınalymynyń kólemi 13,2 mlrd bolǵan edi. Bul týraly QR Saýda jáne ıntegratsııa mınıstrliginiń baspasóz qyzmetinen málim etti, dep habarlaıdy QazAqparat tilshisi.

«Saýda jáne ıntegratsııa mınıstri Serik Jumanǵarın Máskeýge jumys sapary barysynda RF Úkimeti tóraǵasynyń orynbasary Alekseı Overchýkpen kezdesip, eki eldiń saýda-ekonomıkalyq yntymaqtastyǵyn talqylady.

Kelissózder aıasynda Qazaqstan tarapynan kóterilgen eń mańyzdy máselelerdiń biri – «Astrahan-Mańǵyshlaq» sý taratqyshyn qaıta qurý jobasy. Sonymen qatar, Reseıge bolat ónimderin jetkizý, qazaqstandyq kómir men temir keni shıkizatynyń tranzıti jáne Qazaqstanǵa taýarlardy kedergisiz jetkizý máseleleri de qaraldy.

Taraptar eki el arasyndaǵy ózara saýdanyń oń dınamıkasyn da atap ótti. 2022 jylǵy qańtar-shildede Qazaqstan men Reseı arasyndaǵy taýar aınalymy 13,7 mlrd dollar boldy. Bul – ótken jyldyń sáıkes kezeńimen salystyrǵanda 3,5 paıyzǵa kóp», - dep málim etti vedomstvonyń baspasóz qyzmetinen.

Qosa ketsek, Qazaqstan men BAÁ arasyndaǵy taýar aınalymy 2021 jyldyń qorytyndysy boıynsha 50 paıyzǵa artqan bolatyn.