Bıylǵy 5 aıda prokýratýra organdaryna 120 myńnan astam ótinish kelip tústi

ASTANA. QazAqparat - Bıylǵy jyly prokýratýra organdaryna kelip túsken ótinishter byltyrmen salystyrǵanda 7 paıyzǵa artyq.

Bul týraly Astanada ótken baspasóz máslıhatynda QR Bas prokýratýrasy Aryz-shaǵymdardy qaraý týraly zańdardyń qoldanylýyna qadaǵalaý jáne is júrgizý basqarmasynyń basshysy Lázzat Janysova málim etti.

«Bıylǵy 5 aıda prokýratýra organdaryna 121 myń 606 ótinish kelip tústi. Bul kórsetkish byltyrǵy sáıkes kezeńge qaraǵanda 7 paıyzǵa joǵary. Sonyń ishinde Bas prokýratýraǵa 15 myń 234 ótinish keldi», - dedi ol.

Onyń sózinshe, kóbinese adamdar qylmystyq qýdalaý organdarynyń áreketterine nemese áreketsizdigine jáne aktilerine shaǵymdanǵan. Bul kórsetkish 41 paıyzdy qamtyp otyr. 29 paıyzy áleýmettik-ekonomıkalyq saladaǵy zańdylyq máselesine qatysty bolsa, 24 paıyzy sot aktileriniń zańdylyǵy men olardyń oryndalý sharalaryna baılanysty boldy.