Bıylǵy 4 aıda qoǵamdyq kóliktiń qatysýymen 350 jol-kólik oqıǵasy oryn aldy

ASTANA. QazAqparat - QR Bas prokýratýrasy Quqyqtyq statıstıka jáne arnaıy esepke alý jónindegi komıtetiniń málimetterine sáıkes, elimiz boıynsha 2016 jyldyń 4 aıynda 2015 jyldyń osy kezeńimen salystyrǵanda jol-kólik oqıǵasy 2 paıyzǵa tómendedi.

Elimizdiń joldarynda 5038 jol-kólik oqıǵasy bolyp, onda 6977 adam zardap sheken. Bul JKO saldarynan 541 adam kóz jumdy. Al ótken jyldyń osy kezeńinde 5139 jol-kólik oqıǵasy tirkelip, onda 7139 adamnyń densaýlyǵyna zaqym kelgen, onyń ishinde 602-si qaıtys bolǵan.

JKO saldarynan 1118 kámeletke tolmaǵan bala jaraqat alyp, olardyń 37-i qaza tapty.

Statıstıkalyq kórsetkishterge qaraǵanda, jol apattarynyń sebepteri ózgermegen. Jalpy, 90 paıyzdan astam JKO Jol qozǵalysy erejelerin buzatyn júrgizýshilerdiń kinásinen bolady. Atap aıtqanda 4785 apat jasalǵan, onyń ishinde 138 alkogoldik jáne esirtkilik mas kúıinde bolǵan júrgizýshilerdiń kinásinen oryn alǵan.

Eń kóbisi, ıaǵnı 1458 JKO jyldamdyqty arttyrýdan boldy, sonyń saldarynan 221 adam ajal qushyp, 1746-sy jaraqattandy.

Bıylǵy jyly qoǵamdyq kóliktiń qatysýymen 350 JKO bolyp, onda 22 adam qaza tapty, 473-i jaraqattandy.

Aıta keteıik, «Memlekettik quqyqtyq statıstıka jáne arnaıy esepke alý týraly» Qazaqstan Respýblıkasynyń Zańyna sáıkes, Quqyqtyq statıstıka jáne arnaıy esepke alý jónindegi komıtet adamdardyń ólimine nemese jaraqattanýyna ákep soqqan jol-kólik oqıǵalaryn ǵana esepke alady.