Bıylǵy 3-toqsanda tabysy kúnkóristiń eń tómengi deńgeıinen tómen halyqtyń basym úlesi OQO men SQO-da
ASTANA. 12 jeltoqsan. QazAqparat - Úı sharýashylyqtaryn zertteý derekteri boıynsha Qazaqstan Respýblıkasyndaǵy tabysy kúnkóristiń eń tómengi deńgeıiniń shamasynan tómen halyqtyń úlesi 2013 jyldyń 3 toqsanynda 3,1% (533,2 myń adamdy) qurady, bul ótken jylǵy tıisti kezeńnen 0,9 paıyzdyq tarmaqqa tómen. Bul týraly búgin QR Statıstıka agenttiginiń málimetterinde habarlandy.
Tabysy kúnkóristiń eń tómengi deńgeıinen tómen aýyldyq jerdegi halyqtyń úlesi tabysy kúnkóristiń eń tómengi deńgeıinen tómen qalalyq jerdegi halyqtyń úlesinen 3,5 esege artyp, 5,2% (396,7 myń adamdy) qurady.
2013 jyldyń 3 toqsanynda tabysy kúnkóristiń eń tómengi deńgeıinen tómen halyqtyń basym úlesi Ońtústik Qazaqstan (7,8%), Soltústik Qazaqstan (4,2%) oblystaryna keledi, eń az úlesi Astana (1,0%), Almaty (0,9%) qalalaryna.
Halyqtyń tabystary men shyǵystarynyń bólinýin kvantıldik toptar (detsıldik nemese kvıntıldik) boıynsha kórsetkishter anyq kórsetedi. 2013 jyldyń úshinshi toqsanynda 2012 jylǵy tıisti kezeńmen salystyrǵanda 1 jáne 10 detsılder arasyndaǵy tabystardyń aıyrmashylyǵy 3-6 detsılderdiń paıdasyna qysqardy.
«Úı sharýashylyqtarynyń aqshalaı shyǵystary olardyń materıaldyq qamtamasyz etilýine tikeleı baılanysty. Halyqtyń shyǵystary men tutynýy detsıldik bólý kezinde tabystar sııaqty aıtarlyqtaı saralanýdy kórsetedi. Sonymen, mysaly, 2013 jyldyń 3 toqsanynda 10% eń az jáne 10% eń kóp qamtamasyz etilgen halyqtyń azyq-túlik taýarlaryna jumsaǵan shyǵystary arasyndaǵy aıyrmashylyq 4,3 eseni, azyq-túlik emes taýarlarǵa - 5,6 eseni, al aqyly qyzmetterge 8,3 eseni qurady, bul rette shyǵystardaǵy eń joǵary aıyrmashylyq kredıtti jáne qaryzdy jabýǵa (35,7 ese), úıden tys jerde tamaqtaný (14 ese), týystar men tanystarǵa materıaldyq kómek kórsetýge (12 ese) keledi»,-delingen agenttik málimetinde.
