Bıylǵy 11 aıda múgedektik boıynsha járdemaqyǵa 280 mlrd teńge bólindi

NUR-SULTAN. QazAqparat – Qazaqstanda jyl basynan beri múgedektik jáne asyraýshysynan aıyrylý jaǵdaıy boıynsha járdemaqy túrinde 357 mlrd teńgeden astam qarajat tólendi, dep habarlaıdy QazAqparat tilshisi.

«2021 jylǵy qańtar-qarasha aılary aralyǵynda respýblıkalyq bıýdjetten múgedektik boıynsha memlekettik áleýmettik járdemaqy tóleýge 283,5 mlrd teńge, asyraýshysynan aıyrylý jaǵdaıyna baılanysty 74 mlrd teńge baǵyttaldy. 2021 jyldyń qarasha aıynda respýblıkalyq bıýdjetten múgedektik boıynsha memlekettik áleýmettik járdemaqy tóleýge 25,6 mlrd teńge, asyraýshysynan aıyrylý jaǵdaıy boıynsha 7,6 mlrd teńge jumsaldy», - delingen QR Eńbek jáne halyqty áleýmettik qorǵaý mınıstrligi málimetinde.

2021 jylǵy 1 jeltoqsandaǵy jaǵdaı boıynsha múgedektik boıynsha memlekettik áleýmettik járdemaqy alýshylardyń sany 520,8 myń adamdy, asyraýshysynan aıyrylý jaǵdaıy boıynsha 161,9 myń adamdy quraıdy.

Múgedektik jáne asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri múgedektik tobyna jáne sebebine, qaıtys bolǵan (qaza tapqan) asyraýshynyń asyraýyndaǵy adamdar sanyna, sondaı-aq tıisti qarjy jylyna arnalǵan «Respýblıkalyq bıýdjet týraly» zańynda belgilenetin eń tómen kúnkóris deńgeıiniń shamasyna baılanysty bolady.

2021 jylǵy 1 jeltoqsandaǵy jaǵdaı boıynsha múgedektik jónindegi memlekettik áleýmettik járdemaqynyń ortasha mólsheri 49 198 teńgeni, asyraýshydan aıyrylý jaǵdaıynda 46 050 teńgeni qurady.