Bıylǵy 11 aıda qylmystyń tómendeýi elimizdiń barlyq aýmaqtarynda baıqaldy
ASTANA. QazAqparat - 2014 jyldyń 11 aıynda elimizdegi tirkelgen qylmystar deńgeıi ótken jyldyń osyndaı kezeńimen salystyrǵanda 4,9 paıyzǵa (330 506-dan 314 419-ǵa) tómendedi.
«Qylmystylyq barlyq túrleri boıynsha tómendegen, olardyń ishinde asa aýyr qylmystar - 19,2 paıyz (2 511-den 2029-ǵa), aýyr qylmystar - 18,3 paıyz ( 32 092-den 26 234-ke), aýyrlyǵy ortasha qylmystar - 2,7 paıyz deńgeıinde ( 255 380-nen 248 504-ke), sondaı-aq aýyr emes qylmystar 7,1 paıyzǵa (40 523-ten 37 652-ge) azaıǵan»,-delingen QR Bas prokýratýrasy Quqyqtyq statıstıka jáne arnaıy esepke alý jónindegi komıtet málimetinde.
Qylmystyń aldyn alý jónindegi memlekettik organdardyń áreketin úılestirý qylmystylyq quramynyń negizin quraıtyn qylmystardyń tómendeýine yqpal etti, máselen, urlyq 2,1 paıyzǵa, buzaqylyq 14,1 paıyzǵa, tonaý 24,8 paıyzǵa tómendegen. Bulardyń barlyq jasalǵan qylmystar ishindegi ózindik úlesi 71 paıyzdy quraıdy.
Alkogoldik jáne esirtkige eltigen kúıinde jasaǵan qylmys 2,9 paıyzǵa, kámeletke tolmaǵandar jasaǵan qylmys 18,3 paıyzǵa, kóshedegi qylmys 9,3 paıyzǵa jáne qaıtalama qylmys 4,4 paıyzǵa tómendegen.
Álemde naqty krımınogendik jaǵdaıdy baǵalaıtyn ındıkatorlar da qylmystyń tómendegenin kórsetip otyr. Máselen, kisi óltirý sany 19,8 paıyzǵa, qaraqshylyq 32,9 paıyzǵa jáne bopsalaý 18,1 paıyzǵa azaıdy. Qoǵamdaǵy qylmystylyqtyń shynaıy ahýalyn qylmystyń dál osy túrleri kórsetedi. Jalpy qylmystyń tómendeýi elimizdiń barlyq aýmaqtarynda baıqalady.
