Bıylǵy 10 aıda óńdeý ónerkásibi ótken jylǵa qaraǵanda 5,3 paıyz ósti – Asqar Mamın
«Osy jylǵy 10 aıda óńdeý ónerkásibi ótken jylǵa qaraǵanda 5,3 paıyz ósti. Jáırem jáne Aqtoǵaı taý-ken baıytý kombınattarynyń qýatyn arttyrý, altyn shyǵaratyn fabrıka men ferroqorytpa zaýytyn salý boıynsha iri jobalardy iske asyrý, mashına jasaý óndiristeri arqyly negizgi kapıtalǵa ınvestıtsııalar 1,8 esege aıtarlyqtaı ósip, 1,2 trln teńgeni qurady. Kóp ósim farmatsevtıkada 33,6, mashına jasaýda 19,5, qurylys materıaldary óndirisinde 9,3, hımııa ónerkásibinde 6,5, tamaq óndirisinde 3,6 paıyz boldy», - dedi A. Mamın.
Onyń aıtýynsha, munaı-gaz hımııasy salasynda bıyl tehnıkalyq gazdar men oktan kórsetkishin arttyratyn qospalar óndiretin zaýyttar salyndy, sondaı-aq polıpropılen shyǵaratyn zaýyt aıaqtalý satysynda.
«Budan basqa, osy jyly Halyqaralyq munaı-gaz mashınasyn jasaýdy damytý ortalyǵy quryldy, ol taýarlar óndirisin lokalızatsııalaýdy jáne otandyq óndirýshilerdiń múmkindikterin keńeıtýdi qamtamasyz etedi. Osy jyly Indýstrııalandyrý kartasynyń aıasynda tamaq ónerkásibinde, qurylys ındýstrııasynda, mashına jasaýda, metallýrgııada jáne basqa salalarda jalpy somasy 1,3 trln teńgege barlyǵy 139 ındýstrııalyq jobany iske qosý josparlanǵan, 12,7 myń jańa jumys orny qurylady. Onyń ishinde qazirdiń ózinde 1 trln teńgege jýyq somaǵa 83 joba iske qosylǵan. Qalǵandary jeltoqsanda paıdalanýǵa beriledi. Tolyq qýatpen jumys istegende bul jobalardyń óndiris kólemi 1,1 trln teńgeni quraıdy, óndirilgen ónimniń úshten biri eksportqa ketedi. Osy jumysty belsendi jalǵastyrý kerek», - dedi Úkimet basshysy.
