Bıyldyń ózinde 150 myńǵa jýyq adam jańa jumys ornyna ıe boldy - Elbasy
Búgin QR Parlamentiniń besinshi shaqyrylymynyń ekinshi sessııasynyń ashylýy barysynda sóz sóılegen Memleket basshysy Nursultan Nazarbaev osylaı málimdedi.
«Meniń áleýmettik jańǵyrý jónindegi bastamam barsha qazaqstandyqtar tarapynan qyzý qoldaýǵa ıe bolýda. Qoǵam áleýmettik damýdyń naqty baǵdaryn aıqyndady. Bul baǵdar - «Jalpyǵa Ortaq Eńbek Qoǵamy», halyqty eńbekke baýlý, jastardy solaı tárbıeleý. Men elimizdi kózdegen maqsatqa jetkizetin 20 mindetti anyqtap, quzyrly organdarǵa tıisti tapsyrma júktedim. Úkimet ony tıimdi iske asyryp jatyr. Osynaý keleli iske halyq qalaýlylary da belsene atqarýǵa kiristi», - dedi N. Nazarbaev.
Sonymen qatar Prezıdent elimizde jumyssyzdyq deńgeıi 5,2 paıyzǵa deıin tómendegenin, ózin-ózi jumyspen qamtyǵandar sanynyń turǵyndardyń úles salmaǵy boıynsha azaıǵandyǵyn aıtty.
«Tek bıylǵy jyldyń ózinde elimizde 150 myńǵa jýyq adam jańa jumys oryndaryna ıe boldy. Olardyń úshten biri ózin-ózi qamtyǵandar», - dedi Memleket basshysy.