Bıyldan bastap «Úzdik YouTube arna» men «Úzdik podkastqa» Úrker syılyǵy beriledi

ASTANA. QazAqparat - Bul týraly Aqparat jáne qoǵamdyq damý mınıstri Darhan Qydyráli Qonaevta ótip jatqan І Halyqaralyq medıa jáne týrızm forýmynda málimdedi. Jıyndy uıymdastyrýshy - Túrkitildes jýrnalıster qory, dep habarlaıdy QazAqparat.

«Qazir álemdik medıada post-shyndyq kezeńi, jasandy ıntellekt dáýiri bastalǵany bárimizge belgili. Prezıdent Qasym-Jomart Toqaev aqparat salasynyń jańa dáýir talaptaryna saı, jańa sapaǵa ótýi keregin atap ótken bolatyn. TMD elderi arasynda birinshi ret qabyldanǵan «Onlaın platformalar jáne onlaın jarnama týraly» zań osy qajettilikti rettep, olqylyqtyń ornyn toltyrady», - dedi mınıstr.

Sondaı-aq Darhan Qydyráli Qazaqstandaǵy kreatıvti ındýstrııany damytý úshin birqatar naqty jumystar atqarylyp jatqanyn aıtty.

«Qyrkúıek aıynda biz Astana Media Week, New Media forýmy jáne «Úrker» televızııalyq syılyǵyn biriktirip ótkizýdi josparlap otyrmyz. Bıyl «Úrker» syılyǵynda «Úzdik YouTube arnasy» jáne «Úzdik podkast» syndy eki jańa atalym qosyp otyrmyz. Bul salanyń damýyna serpin berip, túrki álemin jaqyndastyra túsedi dep sanaımyz», - dedi mınıstr.

Esterińizge sala keteıik, aldaǵy Astana Media Week, New Media forýmdary, sondaı-aq «Urker-2023» baspa, radıo, ınternet jýrnalıstıka salasyndaǵy ulttyq syılyǵy kúzde Astana qalasynda ótedi.