Bıyldan bastap tegin medıtsınalyq qyzmetterdiń sany artty– dáriger

NUR-SULTAN. QazAqparat – Memlekettik saqtandyrý aıasynda balalarǵa tegin qyzmet kórsetiledi. Bul týraly bastapqy deńgeıde medıtsınalyq kómek kórsetetin densaýlyq saqtaý uıymdary boıynsha baspasóz týrynda aıtyldy, dep habarlaıdy QazAqparat tilshisi.

«№2 qalalyq emhanada 18 jasqa deıingi 18 myń bala tirkelgen. Onyń ishinde 15 jasqa deıingi 16 617 bala, bir jasqa deıingi 821 bala bar», - deıdi №2 qalalyq emhanadaǵy pedıatrııa bóliminiń meńgerýshisi Altyngúl Qolqanatqyzy.

Bul jerde balalarǵa vaktsına egý, profılaktıkalyq tekseris, dári-dármek, taldaý jumystarynyń bári MÁMS aıasynda tegin kórsetiledi.

«1 qańtardan bastap bul qyzmet túrleriniń qatary ulǵaıyp jatyr, ıaǵnı budan bylaı bizdiń emhana MÁMS aıasynda gormondardy taldaý, kompıýterlik jáne magnıtti-rezonanstyq tomografııa, ońaltý jumystaryn ózi júrgize alady», - deıdi ol.

Byltyrǵy osy ýaqytpen salystyrǵanda, bıyl atalǵan emhanadaǵy ońaltý ortalyǵynan 34 bala em alyp shyqqan.

«Bul byltyrǵy osy ýaqyttaǵy kórsetkishke qaraǵanda úsh ese kóp. Buryn sal aýrýyna shaldyqqan, Daýn sındromy bar, aýtıst balalary bar ata-analar arnaıy ońaıtý ortalyqtaryna baratyn bolsa, qazirgi ýaqytta MÁMS aıasynda osy jerde ońaltý jumystarynan óte alady. Sondaı-aq, bizde pedıatrııa salasynyń mamandary MÁMS arqyly tegin oqyp shyqty. Aqparattandyrý salasy boıynsha bizdiń medbıkeler, dárigerler kúndelikti ózderiniń tirkelgen aýmaǵyndaǵy ata-analarmen aqparattandyrý boıynsha jumys istep jatyr. Olardyń 90%-y tolyq aqparattandyrylǵan dep aıta alamyz», - deıdi Pedıatrııa bóliminiń meńgerýshisi.

Emhananyń bas dárigeri atalǵan qyzmet túrlerin tegin alý úshin ata-ana ne isteýi kerek ekenin aıtty.

«Ártúrli dertterine baılanysty dıspanserlik esepke turatyn balalar bar. Osyndaı ońaltý ortalyǵyna barý úshin bala men anasy ýchaskelik pedıatrdyń joldamasyn alady. Odan keıin bala qaı topqa baratyny, jylyna neshe ret keletini anyqtalady. Sosyn mýltıdıstsıplınarlyq top qurylady. Onyń quramyna reabılıtolog, nevropatolog, psıholog pen logoped kiredi. Olar balaǵa ońaltý jumystaryn júrgizý úshin ne kerek ekenin, ıaǵnı ońaltý jumystaryna qatysty jeke jospar jasaıdy. Kelesi qadam - mýltıdıstsıplınarlyq toptyń sheshim qabyldaýy. Sheshim qabyldanǵannan keıin naýqas balanyń ereksheligine, qandaı kómek qajet ekendigine qaraı em túri bastalady. Bir kýrs 1,5-2 aıǵa sozylady. Eger kýrsty qaıtalap ótý qajet bolsa bala ekinshi jartyjyldyqta keledi», - deıdi №2 qalalyq emhananyń bas dárigeri Lázzat Rýspekova.