Bıyldan bastap memlekettik organdardyń jumysy aqparatqa qol jetkizý kórsetkishimen baǵalanady - Abaev

ASTANA. QazAqparat - Mınıstrler kabınetiniń búgingi otyrysynda QR Aqparat jáne kommýnıkatsııalar mınıstri Dáýren Abaev úkimettik emes uıymdarmen birlesken jumysy boıynsha esep berdi, dep xabarlaıdy QazAqparat tilshisi.

Onyń aıtýynsha, osydan eki jyl buryn qabyldanǵan "Aqparattyq qol jetkizý týraly" zańnyń negizgi maqsaty - memlekettik bıliktiń barlyq tarmaqtarynyń aqparattyq ashyqtyǵyn qamtamasyz etý. Osyǵan baılanysty mınıstrlik atalǵan zańnyń tolyqqandy oryndalýy úshin birqatar sharalardy qolǵa aldy.

«Birinshiden, negizgi quqyqtyq-normatıvtik baza quryldy. Sonyń aıasynda aqparattyq qol jetkizý boıynsha arnaıy komıssııa jumys istep jatyr. Onyń quramynda úkimettik emes uıymdar az emes. Olar barlyq jumysty qoǵamdyq baqylaýda ustap otyr. Ekinshiden, ótken jyly zań normalaryn keńinen túsindirý úshin xalyq arasynda aqparattyq naýqan uıymdastyryldy. San alýan semınarlarǵa memlekettik qyzmetkerler, jergilikti bılik, úkimettik emes uıymdardyń ókilderi men jýrnalıster qatysty. Bul jumys áli de jalǵasyp jatyr. Úshinshiden, mınıstrlik aqparatqa qol jetkizý týraly zań normalaryn júzege asyrylýyn únemi nazarda ustap keledi. Osylaısha, ortalyq jáne jergilikti memlekettik organdardyń ınternet resýrstarynda zańnyń 16-babymen qarastyrylǵan 52 ındıkatordyń bolýyna turaqty monıtorıng júrgizilýde. Onyń nátıjesi boıynsha memlekettik organdarǵa tıisti usynymdar berilip otyrady», - dep atap kórsetti Abaev.

Budan bólek, myńdaǵan zań jobalary ınternet resýrstarda jarııalanyp keledi. Osylaısha, zańdar men baǵdarlamalar xalyqtyń talqysyna salynady.

«Bıyldan bastap memlekettik organdardyń reıtıngisinde aqparatqa qol jetkizý týraly zańnyń talaptaryn oryndaý kórsetkishi eskeriledi. Ol jaǵynan ınternet resýrsty toltyrý men ashyq málimetter portalyna materıal salý jumysyna baza nazar aýdarylady. Osyny erekshe atap ótkim kelip otyr», - deıdi mınıstr.