Bıyldan bastap qazaqstandyqtar Vetnamǵa vızasyz bara alady

ASTANA. QazAqparat – QR Úkimeti men Vetnam Sotsıalıstik Respýblıkasynyń Úkimeti arasyndaǵy ulttyq, jalpyazamattyq pasport ıelerin vızalyq talaptardan bosatý týraly kelisimge qol qoıý týraly» Úkimet qaýlysynyń jobasy ázirlendi, dep habarlaıdy QazAqparat tilshisi.

«QR Úkimeti men Vetnam Sotsıalıstik Respýblıkasynyń Úkimeti arasyndaǵy ulttyq, jalpyazamattyq pasport ıelerin vızalyq talaptardan bosatý týraly kelisimniń jobasy maquldansyn. QR Premer-Mınıstriniń orynbasary – Syrtqy ister mınıstri Murat Ábýǵalıuly Nurtileýge osy kelisimge QR Úkimeti atynan qol qoıýǵa ókilettik berilsin», - delingen Ashyq NQA portalynda jarııalanǵan qujatta.

Qaýly jobasynda kórsetilgendeı, endi qazaqstandyqtar Vetnamǵa, tıisinshe ol el azamattary Qazaqstanǵa 30 kúnge vızasyz kele alady.

«Eger adamdar ekinshi memleket aýmaǵynda 30 kúnnen artyq qalýǵa nıet bildirse, osy memlekettiń zańnamasy men normatıvtik aktilerine sáıkes talap etiletin tıisti vıza alýǵa mindetteledi», - dep jazylǵan kelisimde.

Qujat 2 maýsymǵa deıin kópshilik talqylaýda bolady.

Qosa ketsek, 17 mamyrda Qazaqstan men Qytaı ózara vızasyz rejım týraly kelisimge qol qoıdy.