Bıyldan bastap Qazaqstan kedendik rásimdeý ortalyqtarynda áıelder ujymy ǵana qyzmet etedi

ASTANA. QazAqparat - Qazaqstanda kedendik rásimdeý ortalyqtarynyń ujymy bıyl tolyqtaı áıelderden jasaqtalmaq. Bul týraly búgin QR Qarjy mınıstrligi Memlekettik kirister komıteti Damý jáne jańǵyrtý departamentiniń dırektory Erjan Birjanov málim etti.

«Komıtette «Ádemilik álemdi qutqarady degen joba qolǵa alyndy. Ol boıynsha eldegi kedendik rásimdeý ortalyqtarynyń ujymy tek áıelderden jasaqtalmaq. Búgin Astana boıynsha barlyq qyzmetkerler jeke jáne kásibı qasıetterge qatysty synaqtan ótti. Qazirgi ýaqytta Astanadaǵy kedendik rásimdeý ortalyǵy 100 paıyzǵa áıelderden quralyp otyr», - dedi ol Ortalyq kommýnıkatsııalar qyzmetinde ótken brıfıngte.

Departament basshysynyń atap kórsetkenindeı, qazaqstandyq áıelder jemqorlyqqa bara bermeıdi, qujattarǵa da muqııat keledi. Osyǵan baılanysty atalǵan joba qolǵa alyndy.
«Mundaı sharanyń júzege asyrylýynyń arqasynda bıýdjetke túsetin túsimderdiń kólemi artyp, memlekettik qyzmettiń sapasy artty, adamdardan túsetin shaǵymdar da kemidi. Atalǵan joba respýblıkadaǵy ózge de ortalyqtarǵa da engiziledi. Biz jyldyń sońyna qaraı kedendik rásimdeý ortalyqtarynyń ujymyn tolyqtaı áıel qaýymynan quraıtyn bolamyz», - dep atap ótti E.Birjanov.