Bıyldan bastap eýrokodtardy engizý bastalady - S. Nokın
ASTANA. 24 qańtar. QazAqparat /Qanat Mámetqazyuly/ - 2011 jyldyń birinshi jartysynda elimizdiń qurylys salasynda eýrokodtardy engizý jáne praktıkalyq qoldaný bastalady.
Bul týraly búgin QR Parlamenti Májilisinde ótken Úkimet saǵatynda QR Qurylys jáne turǵyn úı-kommýnaldyq sharýashylyq isteri agenttiginiń tóraǵasy Serik Nokın málim etti.
Jıyn barysynda qurylys salasyndaǵy tehnıkalyq retteý júıesin reformalaý sharalaryna toqtalǵan agenttik tóraǵasy, eýrokodtarǵa aýysýdy kózdeıtin bul úderistiń birneshe jyldarǵa jalǵasatynyn atap ótti. S. Nokınniń aıtýynsha, 2010 jyly atalǵan saladaǵy reformanyń birinshi kezeńi júzege asyp, ol boıynsha «Ǵımarattar men qurylystardyń, qurylys materıaldary jáne buıymdarynyń qaýipsizdigi» reglamenti, eýrokodtarǵa sáıkes keletin qazaqstandyq qurylys normalary saraptalǵan.
«Úkimet talaptaryna sáıkes, elimizde 2011 jyldyń alǵashqy jartysynda eýrokodtardy engizý jáne praktıkalyq qoldaný bastalady. Bul ozyq tehnologııalardy jáne ınnovatsııalardy paıdalanýdy qamtamasyz etýge, sondaı-aq memleket aýmaǵynda ınvestıtsııalyq jobalardy iske asyrý kezinde tehnıkalyq kedergilerdi joıýǵa múmkindik beredi. Bul rette eýrokodtarmen qatar aýyspaly kezeńde elimizde qazaqstandyq normatıvter de qoldanylatyn bolady. Sonymen qatar, aǵymdaǵy jyly ǵımarattar men qurylystardyń konstrýktsııalaryn esepteý jáne jobalaý jónindegi erejeler jınaǵy men quraldardy ázirleý boıynsha aýqymdy jumys kólemin atqarý josparlanyp otyr», - dedi S. Nokın.
