Bıyldan bastap áskerı kafedra bitirýshi túlekterge «leıtenant» sheni beriletin boldy
ASTANA. 2 sáýir. QazAqparat - Qarýly Kúshterde qyzmet etetin leıtenanttardyń tómengi aılyq jalaqysy 114 myńnan bastalady.
Bul jaıynda Qorǵanys mınıstrligi men Qarýly Kúshterdiń basshylyq quramy elordadaǵy joǵary oqý oryndarynyń áskerı kafedralarynda oqıtyn jastarmen kezdesý kezinde málim boldy.
Qorǵanys mınıstrliginiń málimetine qaraǵanda, bas qosýdyń basty maqsaty - stýdent jastardy Qazaqstan armııasynyń búgini men erteńinen habardar etý jáne bolashaǵyn Otan qorǵaýǵa arnaǵysy keletin jastardy ásker qataryna tartý. Kezdesýge ásker túrleriniń bas qolbasshylary, departamentter men bas basqarmalardyń bastyqtary, bólim komandırleri qatysty.
Júzdesýdi uıymdastyrýǵa uıytqy bolǵan Qorǵanys mınıstrligi Kadrlar departamentiniń bastyǵy T. Muhtarov jastarǵa áskerı vedomstvodaǵy kadr saıasaty týraly keńirek aıtyp berdi.
Ol stýdent jastarǵa Elbasynyń bıylǵy Qazaqstan halqyna Joldaýynda da adamı kapıtaldyń sapalyq ósýine aıryqsha mán berilgenine toqtaldy. Osyǵan baılanysty áskerı qyzmetshilerdiń jaýyngerlik daıyndyq sapasyn arttyrý arqyly kadrlyq áleýetti jetildirýge barynsha nazar aýdarylyp otyrǵanyn jetkizdi.
Joldaýdyń negizgi talaptaryn iske asyrý maqsatynda qazirgi tańda Qorǵanys mınıstriniń tapsyrmasymen áskerı vedomstvoda jumyldyrý kúshterin tartý arqyly kadrlyq áleýetti jaqsartýǵa arnalǵan keshendi sharalar qabyldanýda.
Bul áskerı kadrlardy jasaqtaýǵa jasalǵan jańasha qadam bolyp otyr. Qarýly Kúshterge qaı kezde de joǵary bilimdi, densaýlyǵy myqty, qylmystyq jaýapkershilikke tartylmaǵan jigitter alynatyny belgili.
Jańa júıe boıynsha zapastaǵy ofıtserlerdiń sapqa turý tártibi ózgeretin bolady. Buryndary olar áskerı komıssarıattardyń tabaldyryǵyn tozdyrsa, endi jaǵdaı basqasha bolmaq. Eger kimde-kim áskerde qyzmet atqarǵysy kelse, óziniń túıindemesin Kadrlar departamentine nemese Qorǵanys isteri jónindegi organdarǵa joldaı alady. Árbir úmitkermen derbes jumys júrgiziledi. Olar arnaıy jasaqtalǵan irikteý qosyndarynda test tapsyrady. Barlyq tekseristen súrinbeı ótken úmitker 3 jylǵa alǵashqy kelisimshartyn jasaıdy. Bul merzim aıaqtalǵan soń ofıtserdiń kelisimshartyn sozýǵa nemese zapasqa ketýge múmkindigi bar.
Sondaı-aq, 2005 jyldan beri áskerı kafedra bitirýshi túlekterge «leıtenant» áskerı shenin berý toqtatylǵan bolatyn. Bıyldan bastap bul júıe qalpyna keltirildi.
Aǵymdaǵy jyly Memleket basshysy «Áskerı qyzmet jáne áskerı qyzmetshilerdiń mártebesi týraly» Zańǵa qol qoıdy. Ol Zańda áskerılerge qatysty qajetti áleýmettik aspektiler keńinen qamtyldy.
Kadrlar departamentiniń bastyǵy bolashaq ofıtserlerge Qarýly Kúshterde qyzmet etetin leıtenanttardyń tómengi aılyq jalaqysy 114 myńnan bastalatynyn jetkizdi. Sonymen qatar, olar qyzmettik baspanamen qamtamasyz etilip, tegin medıtsınalyq kómek ala alady.
