Bıyldan bastap ár úıge sý jelilerin tartý men ólshegish quraldaryn ornatý eskerilip otyr - Sý resýrstary komıteti

Bul týraly búgin Astanada ótken baspasóz máslıhatynda QR Aýyl sharýashylyǵy mınıstrligi Sý resýrstary komıtetiniń tóraǵasy Anarbek Orman málim etti.

Komıtet basshysy búginde eldi mekenderdi taza aýyz sýmen qamtý jaıy ózekti ekendigin aıta kele, «osy másele 2002-2010 jyldar aralyǵynda beligilengen bolatyn. Qazirgi kezde 3,5 myńǵa jýyq eldi mekenderde sý qubyrlary jańartyldy. Bizdiń túpkilikti josparymyzda eldi mekenderdegi halyqty 24 saǵat sýmen qamtamasyz etý qarastyrylǵan edi. Alaıda keıbir kemshilikterdiń saldarynan búginde sol jerlerdiń kóbinde, ıaǵnı 2,5 myńǵa jýyǵynda sý saǵattap beriledi. Atap aıtqanda 24 saǵattyń ornyna 6-8 saǵat sý berilmeıdi»,-dedi.

Onyń sózine qaraǵanda, munyń kemshiligi atalǵan aýqymdy sharany iske asyrý kezinde jobalaý jumystarynda kóptegen qatelikterge jol berilgen. «Kóshelerge sý baǵandary ornatylǵan, biraq sý qubyrlary ár úıge tartylmaǵan. Sonymen qatar ólsheýish quraldarymen de jabdyqtalmaǵan»,-dedi A. Orman.

Komıtet basshysy qazirgi kezde qurylys normasy men erejesine arnaıy tolyqtyrý men ózgertýler engizilgenin alǵa tartty. «Bıyldan bastap sý júıesiniń qurylysy men jańartý máseleleri boıynsha ár úıge sý jelilerin tartyp berý, ólshegish quraldarymen qamtamasyz etý tolyǵymen eskerilip otyr», - dedi ol.

Munymen qosa, A. Orman Úkimettiń tapsyrmasy boıynsha sý júıesi tartylatyn eldi mekenderdiń arnaıy tizimi qurylatynyn jetkizdi. Osy túzimniń birinshi satysynda sý máselesi tolyǵymen sheshilmegen aýdan ortalyǵynyń turǵyndary, ekinshisinde halqy 1 myń jáne odan kóp turatyn jerler, sondaı-aq kelesisinde 1 myń jáne odan sany tómender meken etken aýyldarda sý júıesi tartylatyn bolady.

Komıtet tóraǵasynyń aıtýynsha, qazirgi ýaqytta aýyz sýmen qamtamasyz etýdiń jańa baǵdarlamasy ázirlenýde jáne ony bıylǵy jyldyń qyrkúıek aıynda tolyǵymen daıarlap, tanystyrý josparlanyp otyr.

Taratylǵan málimetterge qaraǵanda, 2002-2010 jyldarǵa arnalǵan aýyz sý baǵdarlamasyn júzege asyrýǵa barlyq qarjy kózderinen 194,9 mıllıard teńge bólinip, ıgerilgen.

Aıta keteıik, ótken aptada Bas prokýratýra halyqty sýmen qamtamasyz etý kezinde, onyń ishinde «Aýyz sý» memlekettik baǵdarlamasyn iske asyrý kezinde zańdardyń saqtalýyna turaqty qadaǵalaý aıasynda tekserýlerdiń nátıjesin jarııalaǵan bolatyn. Prokýratýra málimetterine boıynsha birqatar óńirlerde memlekettik satyp alý rásimderin ótkizý kezinde zań talaptaryn buzý faktileri anyqtalǵan, sondaı-aq sýmen jabdyqtaý nysandary qurylysyn salý jónindegi konkýrstarǵa qatysýǵa konkýrstyq ótinimdi qoldaný merzimderi ótip ketken, biliktilik talaptaryna sáıkes kelmeıtin kompanııalar jiberilip, konkýrs jeńimpazdary bolyp tanylǵan. Prokýratýranyń málimetine qaraǵanda, jumys oryndalmaǵan nemese onyń kólemi asyra kórsetilgen sý qubyry toraptary obektilerin qabyldaý faktileri de oryn alǵan. Jalpy alǵanda, sýmen qamtamasyz etý máseleleri turǵysynda tekserýler nátıjeleri boıynsha prokýrorlar ústimizdegi jyldyń basynan bastap zańbuzýshylyqty joıý týraly 60-tan astam usynys engizdi. 3 qylmystyq is, 25 ákimshilik quqyqbuzýshylyq týraly is qozǵaldy, 15 materıal protsessýaldyq sheshim qabyldaý úshin qarjy polıtsııasyna jiberildi.