Bıyldan bastap Almatyda 37 myń oqýshyǵa arnalǵan 22 mekteptiń qurylysy bastalady
Memleket basshysynyń tapsyrmasyn ýaqtyly jáne sapaly oryndaý maqsatynda Oqý-aǵartý mınıstrligi bilim berý júıesin damytýdyń 2023-2029 jyldarǵa arnalǵan jol kartalaryn ázirleý jumysyn jalǵastyryp jatyr.
Oqý-aǵartý mınıstri Ǵanı Beısembaev pen Almaty qalasynyń ákimi Erbolat Dosaev bilim berý júıesin damytýdyń 2023-2029 jyldarǵa arnalǵan óńirlik jol kartasyna qol qoıdy.
«Ótken jyldyń qyrkúıek aıynda qabyldanǵan «Almaty qalasynyń 2025 jylǵa deıingi damytý baǵdarlamasy jáne 2030 jylǵa deıingi orta merzimdi perspektıvalar» strategııasyn iske asyrý aıasynda biz sapaly bilim berýdi damytý boıynsha jol kartasyn ázirledik. Búgin biz qol qoıǵan jol kartasy orta bilim berý máselelerin sheshý, pedagogterimizdiń biliktiligin arttyrý jáne basqa da mańyzdy máselelermen tolyqtyrylǵanyna qýanyshtymyn», - dedi Almaty qalasynyń ákimi Erbolat Dosaev.
Almaty qalasy ákimdigi mektepke deıingi uıymdarda oryn tapshylyǵy máselesin sheshý úshin 2029 jylǵa deıin balabaqshalarda memlekettik tapsyrysty 35 myń orynǵa ulǵaıtýdy josparlap otyr. Mektepterdegi oryn tapshylyǵy máselesi de sheshilmek. «Jaıly mektep» jobasy aıasynda 2023 jyldan bastap respýblıkalyq bıýdjet esebinen 37 myń oqýshyǵa arnalǵan 22 mekteptiń qurylysyn bastaý josparlandy. Orta bilim berý uıymdaryna taǵy 30 mektep pen 9 qosymsha qurylys salý 2025 jylǵa deıin oryn tapshylyǵyn 23 myńǵa azaıtýǵa múmkindik beredi.
Sondaı-aq, 50 bilim berý nysanyna kúrdeli jóndeý jumystary júrgiziledi, 200-ge jýyq mektepke zamanaýı pándik kabınetter men ınteraktıvti taqtalar alynady.
Jyl saıyn eki myńǵa jýyq pedagog biliktiligin arttyrý kýrstarynan ótedi. Sonymen qatar, bıyl mektepke deıingi tárbıe men oqytýdyń alǵashqy aımaqtyq resýrstyq ortalyǵy qurylady.
«Almatynyń 18 myńǵa jýyq pedagogi biliktilikti arttyrý kýrstarynan ótedi, mektepterdiń basshylyq quramynyń 450 ókili halyqaralyq menedjment baǵdarlamalaryn oqıdy, taǵy 9 myń pedagog fýnktsıonaldyq saýattylyqty, tsıfrlyq quzyrettilikter men daǵdylardy qalyptastyrý baǵdarlamalary boıynsha oqytylady. Memleket basshysynyń tapsyrmasyna sáıkes tegin tehnıkalyq jáne kásiptik bilimmen 100% qamtamasyz etý úshin kolledjderde memlekettik tapsyrysty 20 myńnan astam orynǵa kóbeıtý josparlanyp otyr», - dedi Oqý-aǵartý mınıstri Ǵanı Beısembaev.
Tehnıkalyq jáne kásiptik bilim berý uıymdarynyń qoljetimdiligi men sapasyn arttyrý árqashan mańyzdy. Osyǵan oraı, 2025 jylǵa deıin 300 oryndyq jataqhanasy bar eki jańa kolledj qurylysyn bastaý josparlanyp otyr. Eki kolledjde 600 oryndyq stýdenttik jataqhana salynady. 4 myńǵa jýyq TjKB oqytýshylary biliktilikti arttyrý kýrstarynan, al 600 arnaıy pán muǵalimderi men óndiristik oqytý sheberleri halyqaralyq taǵylymdamadan ótedi. Sondaı-aq, 85 kolledjdiń basshylyq quramy menedjment baǵyty boıynsha biliktiligin arttyrady.
Birqatar is-sharalar ınklıýzıvti bilim berýdi damytýǵa baǵyttalǵan. Jospar boıynsha, PMPK, psıhologııalyq-pedagogıkalyq túzetý kabınetterin keńeıtý, erekshe qajettilikteri bar balalarǵa arnaıy psıhologııalyq-pedagogıkalyq kómek kórsetý úshin memlekettik tapsyrys 1 400 orynǵa artyp, qalalyq ınklıýzıvti resýrstyq ortalyq qurylady.
Tórt ınnovatsııalyq shyǵarmashylyq ortalyq, eki jazǵy lager salý, qosymsha bilim berýge memlekettik bilim berý tapsyrysyn arttyrý men mektep kitaphanalaryn jańǵyrtý josparlanǵan.
Sonymen qatar, jol kartasy balalardyń shyǵarmashylyq jáne zııatkerlik áleýetin damytý, balalardyń quqyqtaryn qorǵaý, bilim berý uıymdarynda sybaılas jemqorlyqqa qarsy is-qımyl jónindegi sharalardy qamtıdy.
