Bıyl «Jyldyń úzdik kitaby» respýblıkalyq baıqaýy ótedi
«Otandyq ádebıetti qoldaý maqsatynda Mádenıet jáne sport mınıstrligi oqyrmandardyń suranysyna ıe kitaptardy konkýrs negizinde memleket esebinen basyp shyǵarady. Onyń ishinde balalar men jasóospirimderge arnalǵan shyǵarmalar da jaryq kóredi. «2010-2020 jyldar aralyǵynda Mádenıet jáne sport mınıstrliginiń qoldaýymen Muzafar Álimbaev, Tumanbaı Moldaǵalıev, Jaqan Smaqov, Ospanhan Áýbákirov, Aqseleý Seıdimbek, Marat Qabanbaı, Shaken Kúmisbaıuly, Qastek Baıanbaev, Baıbota Qoshym-Noǵaı, Asylbek Abdrahman, Baıanǵalı Álimjanov, Nurdáýlet Aqysh, Ábdiraıym Tolymbek, Álibek Faızýllaev sııaqty tanymal jazýshylardyń kitaptary jaryqqa shyǵyp, memlekettik kitaphanalarǵa tegin taratyldy», - dedi Úkimet basshysynyń orynbasary.
Onyń dereginshe, memlekettik tapsyrys aıasynda balalar ádebıetin basyp shyǵarýǵa basymdyq berilip otyr. Atap aıtqanda, 2021 jyly balalar ádebıeti janrynda 40 týyndy 120 myń dana taralymmen basyldy.Memlekettik tapsyryspen basylyp shyqqan ádebıet oqyrmandarǵa qoljetimdi bolý úshin olardyń elektrondy nusqalary Qazaqstannyń ulttyq elektrondyq kitaphanasyna júkteledi. 2019 jyly erte zamannan qalyptasqan qazaq balalar ádebıeti muralaryn saqtap, keler urpaqqa jetkizý maqsatymen «Balalar ádebıetiniń altyn qory» qalyptastyryldy. Arnaıy komıssııanyń sheshimimen qorǵa balalar ádebıeti janrynda 2582 kitap engizildi.
«Byltyr qitap oqýdy dáripteýge baǵyttalǵan úshjyldyq jalpyrespýblıkalyq jospar qabyldandy. Onda 67 is-shara qarastyrylǵan. Jospardyń aıasynda 2021 jylǵy jeltoqsanda danabala.kz balalar ádebıeti saıty iske qosyldy. Saıtta ótken ǵasyrdyń 50 jyldarynan beri jaryqqa shyqqan qazaq qalamgerleriniń 22 kitabynyń elektrondyq nusqasy ornalastaryldy. Qazirgi ýaqytta portalǵa otandyq balalar qalamgerleriniń jáne sheteldik aqyn-jazýshylardyń 200-ge tarta shyǵarmalary júktelgen. Sonymen qatar bıyl respýblıkalyq deńgeıde «Úzdik shyǵarma» «Jyldyń úzdik kitaby» baıqaýlary ótedi», - delingen Eraly Toǵjanovtyń jaýabynda.
