Bıyl jyldyq ınflıatsııa 20-21% deńgeıinde qalyptasady - UB

ASTANA. QazAqparat - Inflıatsııa joǵary deńgeıde qalyptasyp otyr. Qarasha aıynda onyń jyldyq máni 19,6% bolyp, barlyq komponent boıynsha ósti. Bul týraly QazAqparat Ulttyq bankke silteme jasap habarlaıdy.

«Qarasha aıynda aılyq ınflıatsııa birshama baıaýlady, biraq áli de kóp jyldyq ortasha deńgeıden aıtarlyqtaı asyp, joǵary mánde qalyp otyr. Bul ishki suranys ornyqty bolǵan kezdegi joǵary syrtqy ınflıatsııaǵa jáne tutynýshylyq taýarlar ımportynyń logıstıkalyq joldaryn jańa saýda baǵyttaryna qaıta baǵdarlaýdyń jalǵasýyna baılanysty. Osy ortada halyqtyń jáne kásiporyndardyń tarıhı joǵary kórsetkishterge jýyq bolyp otyrǵan ınflıatsııalyq kútýleri men tutynýshylyq kredıtteýdiń ósýi – kúsheıtýshi proınflıatsııalyq faktorlar. Taýar jetkizý tizbegi úzilgen jaǵdaılarda bekimegen ınflıatsııalyq kútýler qysqa merzimdi jáne de uzaq merzimdi taýarlardy tutynýdy yntalandyrady. Syrtqy jaǵdaılar tarapynan monetarlyq talaptardy jappaı kúshetý saldarynan báseńdegen álemdik suranys nátıjesinde orta merzimdi kezeńde syrtqy ortanyń proınflıatsııalyq faktorlary jeńildeıdi dep boljanady. Astyqtyń bitik shyǵýy ınflıatsııaǵa qysymnyń birtindep tómendeýine qosymsha faktor bolady. Jalpy alǵanda azyq-túlik baǵasynyń deńgeıi joǵary bolyp saqtalady. Ýkraınadaǵy áskerı qaqtyǵys – táýekel faktory bolady», - delingen Banktiń habarlamasynda.

Osy kórsetilgen faktorlar eskerile otyryp, ınflıatsııanyń boljamy qaıta qaralǵan.

«Bazalyq stsenarııde bıyl boljam boıynsha jyldyq ınflıatsııa 20-21% deńgeıinde qalyptasady. Baǵalaý boıynsha ınflıatsııanyń sharyqtaý shegi 2023 jyldyń 1-toqsanynda bolady dep boljanady. Joǵary ınflıatsııalyq kútý jáne dezınflıatsııalyq syrtqy orta kezinde saýdany qurylymdyq qaıta qurý nátıjesinde 2023 jylǵa ınflıatsııa boıynsha boljam 11-13%-ǵa deıin kóterildi. 2024 jyly ishki suranystyń ósýi jáne kútýdiń meıilinshe baıaý tómendeýinen ınflıatsııa 7-9% sheginde boljanady. Inflıatsııanyń osy traektorııasy ınflıatsııalyq jaǵdaıdyń jeńildeýine qaraı jáne dándi daqyldardyń baǵasy turaqtalǵan coń ınflıatsııalyq kútýler tómendep, tarıhı ortasha deńgeıde bolatyn jaǵdaıda kútiledi. Bul ınflıatsııanyń budan keıin nysanaly baǵdarǵa jetýine múmkindik beredi», - dep tolyqtyrdy Ulttyq bank.

Eske salsaq, búgin bazalyq mólsherleme taǵy da kóterildi.