Bıyl jyl sońyna deıin Qazaqstannyń barlyq óńirlerinde sýmen jabdyqtaý qyzmetterine saralanǵan tarıfter engiziledi
ASTANA. Qyrkúıektiń 8-i. QazAqparat /Ernur Aqanbaı/ - Aǵymdaǵy jyldyń sońyna deıin Qazaqstannyń barlyq óńirlerinde sýmen jabdyqtaý qyzmetterine saralanǵan tarıfter engiziletin bolady. Bul týraly búgin Úkimet otyrysynda Tabıǵı monopolııalardy retteý agentiginiń tóraǵasy Nurlan Aldabergenov aıtty.
Onyń sózine qaraǵanda, búgingi kúnge deıin sýmen jabdyqtaý qyzmetterine tutynýshylar talaptary boıynsha saralanǵan tarıfter 13 óńirde engizilgen. Al, jyl sońyna deıin qalǵan 3 óńir, ıaǵnı Aqtóbe, Qostanaı jáne Mańǵystaý oblystarynda saralanǵan tarıfterdi engizý qamtamasyz etiledi. Sonyń nátıjesinde sý arnalary tabystary 13,2 mlrd. teńgege ósetin bolady. Sýdy tutyný kólemi 10 paıyzǵa deıin tómendep, ol 33,3 mln. tekshe metrdi nemese 1,67 mlrd. teńgeni quraıdy. N. Aldabergenov 2010-2014 jyldarǵa arnalǵan tarıftik saıasat jónindegi salalyq baǵdarlama sheńberinde 2014 jylǵa deıin sýǵa tutyný kólemine qaraı tarıfterdi odan ári saralaý kózdelgenin atap kórsetti. Bul jumysty júrgizýge Dúnıejúzilik qaıta qurý jáne damý banki kómektesedi.
