Bıyl jumysshylardyń aldyndaǵy 1,5 mlrd teńge eńbekaqy qaryzy óteldi
ASTANA. QazAqparat - Qazaqstanda eńbek daýlary men eńbekaqy boıynsha qaryzdar azaıyp keledi.
Bul týraly búgin Úkimet otyrysynda jańa Eńbek kodeksin quqyqtyq turǵyda qoldaný tájirıbesi men jumysshylardy qorǵaýǵa qajet sharalarǵa qatysty baıandama jasaǵan QR Eńbek jáne halyqty áleýmettik qorǵaý mınıstri Tamara Dúısenova málim etti, dep habarlaıdy QazAqparat.
"Búginde el ekonomıkasynda jumyspen qamtylǵandardyń sany 8,5 mıllıonnan asty nemese jalpy Qazaqstan halqynyń 50 protsentine jýyqtady. Azamattardyń eńbek quqyqtaryn qorǵaý jáne eńbek qatynastaryn retteý qaısy qoǵamnyń bolsa da, ózekti máselesi bolyp keledi. Dúnıejúzilik ekonomıkalyq forým eńbek naryǵynyń tıimdiligin jahandyq básekege qabilettilik ındeksi tizbesine engizip, jyl saıyn jumys berýshiler arasynda táýelsiz saýalnama júrgizedi. 2016 jyldyń qorytyndysy boıynsha, osy beldi uıymnyń júrgizgen saýalnamasy boıynsha, Qazaqstan 140 memlekettiń arasynda 20-oryndy alyp, 30 damyǵan memlekettiń qataryna kirdi. Bul eńbek qatynastaryn retteıtin taraptardyń múddeler tepe-teńdigin saqtaı otyryp, atqarylǵan júıeli jumystyń nátıjesi", - dep atap ótti T. Dúısenova.
Jaqyn aradaǵy úsh jylda, zııandy óndiriste jumys isteıtin azamattardyń densaýlyǵyn jaqsartý maqsatynda, qysqartylǵan jumys ýaqytyn, jyl saıynǵy qosymsha tólenetin eńbek demalysyn jáne sút nemese sútke teń emdik-aldyn alý tamaqtaryn taǵaıyndaý týraly salalyq qaǵıdattar qaıta saraptaýdan ótpek. Sonymen qatar, mınıstrlikte áıelder eńbegin retteýge erekshe kóńil bólinbek.
Qazaqstanda 122 eńbek standarty bekitilip, eńbek qaýipsizdigi men ony qorǵaý talaptarynan turatyn 11 standart qaıta qarastyryldy jáne bızneske baılanysty tekserý paraqtarynyń talaptary 43-ten 24-ke deıin yqshamdaldy.
Nátıjesinde tekseriletin nysandar sany 2012 jylǵy 18 myńnan 2016 jyly 10 myńǵa deıin azaısa, 2017 jyldyń 5 aıynda 5 myń uıymnyń tynys-tirshiligi eksheldi.
"Bıylǵy 5 aı aýqymynda 10 myńnan astam jumysshynyń 1,5 mlrd. teńge qaryzy óndirildi. Aǵymdaǵy 2017 jyldyń maýsym aıyndaǵy eńbekaqy boıynsha qaryz 88 mln. teńgeni kórsetýde. 2016 jyly óndiriste zardap shekkenderdiń sany 2015 jylmen salystyrǵanda 2,4%-ǵa azaıyp (1723 adamnan 1683 adamǵa), 670 myńnan astam jumysshy zııandy eńbek ahýalyndaǵy jumysy úshin túrli ótemaqylarǵa ıe boldy. Bul maqsatqa jumys berýshiler jaǵy 99,7 mlrd. teńge bóldi", - dedi T. Dúısenova.
Jumys oryndarynyń qysqarýyna jol bermes úshin, Mınıstrlik tarapynan tıisti memorandýmdarǵa qol qoıylýda. Qazirgi ýaqytta memorandýmdar arqyly 2,8 mln. adamnyń jumys ornynyń saqtalynýy kózdelip otyr.
Kásiporyndarda qaýipsiz eńbek jaǵdaıyn qalyptastyrýda, quramyna jumys berýshiler men kásipodaqtar ókilderi kiretin 12 000 óndiristik keńes jasaqtaldy.
QR Eńbek jáne halyqty áleýmettik qorǵaý mınıstrligi Kásipodaqtar federatsııasymen birlesip, kásipodaqtar qyzmetin jetildirý men eńbek kıkiljińderin sheshý máseleleri boıynsha zań jobasy tujyrymdamasyn ázirledi.
