Bıyl «Jumyspen qamtý 2020 jol kartasy» baǵdarlamasyna 37,3 mlrd. teńge qarastyryldy

ASTANA. QazAqparat - 2015 jyly «Jumyspen qamtý 2020 jol kartasy» baǵdarlamasyn iske asyrýǵa 37,3 mlrd. teńge qarastyryldy. Bul týraly búgin Ortalyq kommýnıkatsııalar qyzmetinde brıfıngte QR Densaýlyq saqtaý jáne áleýmettik damý vıtse-mınıstri Dáýlet Arǵandyqov málim etti.

«Bıyl baǵdarlamany ári qaraı iske asyrýǵa 37,3 mlrd. teńge qarastyryldy. Onyń ishinde 13,8 mlrd. teńge baǵdarlamanyń birinshi baǵytyn qarjylandyrýǵa bólindi. Sonyń aıasynda 520 nysanǵa jóndeý jumystary júrgizilip, 30 nysannyń qurylysy jalǵasady. Jumyspen qamtý ortalyqtary arqyly olarǵa 4 myńdaı adam jumysqa ornalastyryldy»,-dedi Arǵandyqov.

Onyń sózine qaraǵanda, 3,3 myń ózin-ózi jumyspen qamtyǵandar men jumyssyz azamatqa shaǵyn nesıe berýge 10 mlrd. teńgeden astam qarjy bólingen. Úshinshi baǵyt aıasynda aǵymdaǵy jyly 1 myńnan astam adam kásibı oqýǵa jiberilip, jastar men turǵyndardyń maqsatty toptaryna jatatyn azamattar úshin 13 myńǵa tarta jumys orny quryldy.