Bıyl jumys isteıtin azamattardyń 85 paıyzynyń eńbek kelisimsharty avtomattandyrylady

NUR-SULTAN. QazAqparat – Bıyl Eńbek kelisimsharttaryn esepke alýdyń biryńǵaı júıesine jumys isteıtin azamattardyń 85 paıyzy tirkeledi. Bul týraly QR Eńbek jáne halyqty áleýmettik qorǵaý vıtse-mınıstri Erbol Ospanov aıtty, dep habarlaıdy QazAqparat tilshisi.

«Eńbek kelisimsharttaryn esepke alýdyń biryńǵaı júıesi jaıynda aıtar bolsaq, búginde 3,9 mln eńbek kelisimsharty tirkeldi. Aqparattyq júıege 150 myńǵa jýyq jumys berýshi qosyldy. Bul barlyq jumys isteıtin azamattardyń 70 paıyzyn quraıdy», – dedi Erbol Ospanov ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe, atalǵan is-sharalardyń arqasynda jumysqa ornalasý protsesterin jeńildetýge, jumysqa ornalasýǵa qajetti qujattardyń sapasyn arttyrýǵa, azamattardyń eńbek quqyqtarynyń saqtalýyna monıtorıng júrgizýge, kadrlyq is júrgizý protsesterin avtomattandyrýǵa múmkindik týyp otyr.

«Sonymen qatar bul júıe azamattardyń avtomatty túrde elektrondy isterin qalyptastyrýǵa jáne eńbek resýrstaryn qajetti boljamdalýyna múmkindik beredi. Bıyl bizdiń aldymyzda eńbek kelisimsharttarynyń keminde 85 paıyzyn tirkeý mindeti tur», - dedi vıtse-mınıstr.