Bıyl júgeri óndirýden rekordtyq ónim alyndy- Amandyq Batalov
ASTANA. QazAqparat - Almaty oblysynda ústimizdegi jyly 1453 gektar jerge júgeri egilip, odan 532 myń tonna ónim alyndy, dep habarlaıdy QazAqparat tilshisi.
«Bıyl júgeri sharýashylyǵynda ozyq tehnologııany engizýdiń nátıjesinde 1453 gektardan 532 myń tonna ónim alyndy, bul sońǵy 27 jyldaǵy rekordtyq ónim. Panfılov aýdanynyń fermerleri tamshylatyp sýǵarýdy engizýdiń arqasynda, ár gektardan 120 tsentnerge deıin ónim aldy, bul ortasha oblystyq kórsetkishten 2 ese artyq. Jarkent krahmal-sirne zaýytynyń qýaty jańǵyrtýdan keıin 10 myń tonnadan 135 myń tonnaǵa ulǵaıdy, sonyń arqasynda júgerini qaldyqsyz óńdeý tsıkli qamtamasyz etildi, bul óz kezeginde ónimniń 27 túrin shyǵarýǵa múmkindik berdi», - dedi oblys ákimi A.Batalov.
Onyń aıýynsha, búgingi kúni respýblıkadaǵy aýyl sharýashylyǵy jalpy óniminiń 17 % oblystyń úlesine tıesili. Agroónerkásip kesheniniń áleýetin barynsha paıdalaný maqsatynda óńirlik baǵdarlama ázirlenip, 9 basymdy baǵyt aıqyndaldy (etti-sútti mal sharýashylyǵy, qoı sharýashylyǵy, qyzylsha-qanty, maı, baǵbanshylyq, kartop sharýashylyǵy, jylyjaı jáne sý sharýashylyǵy).
«Egistikti ártaraptandyrý sheńberinde qant qyzylshasy (2000 gektarǵa), júgeri (1453 gektarǵa), jem-shóp daqyldary (1215 gektarǵa), kókónis (707 gektarǵa) ósirý alaptary ulǵaıtyldy. Bıyl qant qyzylshasy 11 myń 200 gektarǵa sebilip, odan 440 myń tonna qyzylsha jınaldy. Nátıjesinde ónim túsimi 32 % ósti», - dedi ol.
Sondaı-aq, aımaq basshysy keleshekte taǵy eki qant zaýytyn iske qosý jospary baryn (Qarabulaq, Alakól), ol boıynsha búginde ınvestorlarmen kelissózder júrgizilip jatqanyn aıtyp ótti.
Buǵan deıin habarlaǵanymyzdaı bıyl oblysta 32 myń jumys orny ashyldy.
