Bıyl jol-kólik oqıǵasy 3 paıyzǵa tómendedi
ASTANA. QazAqparat - QR Bas prokýratýrasy Quqyqtyq statıtıska jáne arnaıy esepke alý jónindegi komıtetiniń málimetine sáıkes, respýblıka boıynsha 2015 jyldyń 5 aıynda 2014 jyldyń sáıkes kezeńimen salystyrǵanda jol-kólik oqıǵasy 3 paıyzǵa tómendegen.
«Elimizdiń joldarynda 6 758 jol-kólik oqıǵasy orny alyp, 9384 adam zardap shekti, al ótken jyldyń 5 aıynda 6941 jol-kólik oqıǵasy tirkelip, 9 472 adamnyń densaýlyǵyna zaqym kelgen. Jol-kólik oqıǵasynyń saldarynan jaraqat alýshylardyń sany tómendegeni baıqalady, 2014 jyldyń 5 aıynda 8698 (byltyr 8599) adam jaraqat alǵan. Bul rette, JKO saldarynan 785 adam qaza tapty, bul kórsetkish ótken jyldyń osy kezeńimen salystyrǵanda 1 paıyzǵa óskendigi baıqaldy»,-delingen komıtet málimetinde.
Almaty qalasy JKO boıynsha birinshi orynda - 2 174 JKO nemese 32 paıyzy bolyp otyr. Apattylyǵy az óńir retinde Soltústik Qazaqstan oblysy tirkeldi, onda 87 JKO oryn alǵan.
Aqmola 131 (byltyr 216), Qostanaı 192 (243) jáne Ońtústik Qazaqstan 931 (1108) oblystarynda JKO az jasalǵan. Batys Qazaqstan 156 (109) jáne Shyǵys Qazaqstan 501 (443) oblystarynda jáne Astana qalasynda 280 (227) JKO-nyń birshama ósýi baıqaldy.
Statıstıka kórsetip otyrǵandaı, jol apattarynyń sebepteri ózgerissiz qalyp otyr. Burynǵysynsha JKO kóbinese nemese 90 paıyzy Jol qozǵalysy erejelerin óreskel buzatyn júrgizýshilerdiń kinásinen oryn alýda. Máselen, 6 362 jol apatynyń ishinde 202-si alkogoldik nemese esirtkilik masaıý kúıinde júrgizýshiniń qatysýymen bolǵan .
Ákimshilik zańdylyq aıasynda alkogoldik nemese esirtkilik mastaný kúıinde kólik júrgizgeni úshin 1457 júrgizýshi tutqyndaldy jáne 11 229-y júrgizý quqyǵynan aıyryldy.
