Bıyl «Jol kartasynyń« turǵyn úı-kommýnaldyq sharýashylyq sharalary aıasynda 43 myńnan astam jumys oryndary ashylady

Búgin QR Parlamenti Májilisinde ótken Úkimet saǵatynda QR Qurylys jáne turǵyn úı-kommýnaldyq sharýashylyq isteri agenttiginiń tóraǵasy Serik Nokın osylaı málim etti, dep habarlaıdy QazAqparat.

«Kommýnaldyq sektordy damytýdaǵy alǵa qoıylǵan mindetterdi júzege asyrý nátıjesinde birqatar nátıjege qol jetkizemiz dep otyrmyz. Atap aıtqanda, aldaǵy ýaqytta kommýnaldyq qyzmet kórsetetin kásiporyndardyń qyzmeti jeke bıznes úshin tartymdy bolýǵa tıis. Al kommýnaldyq kásiporyndar úzdiksiz jáne paıdamen jumys isteýi qajet. Sonymen birge 2010 jyly turǵyn úı-kommýnaldyq sharýashylyqty damytý sheńberinde «Jol kartasy» boıynsha is-sharalardyń qamtyla túsýi jalǵasady. Máselen, bul baǵdarlama aıasynda aǵymdaǵy jyly ákimdikter - 48 mlrd. teńge, onyń ishinde respýblıkalyq bıýdjetten - 30,5 mlrd. teńge jáne jergilikti bıýdjetten 17,4 mlrd. teńge somasynda qarajat josparlanyp otyr», dedi S. Nokın.

Agenttik tóraǵasynyń aıtýyna qaraǵanda, atalǵan qarajat esebinen ınjenerlik jeliler men nysandardy jóndeý jáne qaıta jańǵyrtý boıynsha 623 joba iske asady dep kózdelgen. Bul rette bıylǵy jyly 43 myńnan astam jumys orny ashylatyn bolady.