Bıyl «Jol kartasy» aıasynda turǵyn úı-kommýnaldyq sharýashylyǵy salasynda 623 joba júzege asyrylady
ASTANA. Aqpannyń 16-sy. QazAqparat /Ernur Aqanbaı/ - Bıyl «Jol kartasy» baǵdarlamasy aıasynda turǵyn úı-kommýnaldyq sharýashylyǵy salasynda 623 jobany júzege asyrý josparlanyp otyr. Bul týraly búgin Astanadaǵy semınarda QR Qurylys jáne turǵyn úı-kommýnaldyq sharýashylyǵy isteri agenttigi Turǵyn úı saıasaty jáne turǵyn úı-kommýnaldyq sharýashylyǵy departamentiniń Kommýnaldyq sharýashylyqty damytý basqarmasynyń bastyǵy Indıra Shermanova aıtty,
dep habarlaıdy QazAqparat.
Onyń aıtýynsha, «Jol kartasy» aıasynda turǵyn-úı kommýnaldyq sharýashylyǵy salasyndaǵy jobalardy júzege asyrýǵa 48 mlrd. teńge qarastyrylyp otyr. Onyń 30,5 mlrd. teńgesi respýblıkalyq bıýdjettiń, 17,4 mlrd. teńgesi jergilikti bıýdjetterdiń qarjysy. «Injenerlik jeliler men nysandardy jóndeý jáne jańǵyrtý boıynsha 623 jobany júzege asyrý josparlanyp otyr. Nátıjesinde 43 myńnan astam jumys orny qurylady», dedi ol.
I. Shermanovanyń sózine qaraǵanda, 2009 jyly turǵyn-úı kommýnaldyq sharýashylyǵyn jańartý boıynsha óńirlerde 862 joba júzege asyrylǵan. 737 shaqyrym elektr jelileri, 1029 shaqyrym sýmen qamtý jelileri, 284 shaqyrym jylý trassasy, avtojoldar, júzdegen mektepter men aýrýhanalar, mádenıet jáne sport nysandary jóndelgen.
