Bıyl «Jol kartasy» aıasynda Turǵyn úı-kommýnaldyq sharýashylyǵy salasynda 39 myń jumys orny quryldy - S.Nokın
ASTANA. Shildeniń 20-sy. QazAqparat /Ernur Aqanbaı/ - Bıyl «Jol kartasy» aıasynda Turǵyn úı-kommýnaldyq sharýashylyǵyn damytý jobalaryn júzege asyrý nátıjesinde elimizde 39 myńǵa jýyq jumys orny quryldy.
Bul týraly búgin selektor formatyndaǵy Úkimet otyrysynda Qurylys jáne Turǵyn úı-kommýnaldyq sharýashylyǵy isteri jónindegi agenttiginiń tóraǵasy Serik Nokın málim etti.
Onyń sózine qaraǵanda, aǵymdaǵy jyly «Jol kartasy» aıasynda Turǵyn úı-kommýnaldyq sharýashylyǵy baǵyty boıynsha 653 jobany júzege asyrý josparlanǵan. Qazirgi ýaqytta 14 joba, sonyń ishinde Qaraǵandy oblysynda - 11 joba, Soltústik Qazaqstan oblysynda - 2 joba jáne Mańǵystaý oblysynda 1 joba aıaqtalǵan. Qalǵan 639 joba júzege asyrý satysynda tur. S.Nokın 2010 jyly «Jol kartasy» aıasynda Turǵyn úı-kommýnaldyq sharýashylyǵy nysandaryn qaıta jańartýǵa jáne jóndeýge bas-aıaǵy 50,4 mlrd teńge bólingenin aıtty. Onyń 32,8 mlrd. teńgesi respýblıkalyq bıýdjettiń, al 17,6 mlrd. teńgesi jergilikti bıýdjetterdiń qarjysy.
«Qazirgi kúnde ákimdikterge 32 mlrd. teńge, sonyń ishinde respýblıkalyq bıýdjetten 20 mlrd. teńge jáne jergilikti bıýdjetterden 12 mlrd. teńge aýdaryldy. Oblystardyń jáne Astana men Almaty qalalary ákimdikteriniń derekteri boıynsha, 29 mlrd. teńge nemese aýdarylǵan qarjynyń 89 paıyzy ıgerilgen. Sonyń ishinde, respýblıkalyq bıýdjet qarjysynyń 93 paıyzy jáne jergilikti bıýdjetter qarjysynyń 84 paıyzy qajetke jaratyldy», - dedi S.Nokın.
Onyń aıtýynsha, respýblıkalyq bıýdjet qarjysyn jetkiliksiz ıgerý Shyǵys Qazaqstan oblysynda (40 paıyz) baıqalýda. Alaıda bul atalmysh óńirdegi ótken qystaǵy aýa-raıynyń qolaısyzdyǵymen baılanysty. Sondyqtan da bul óńir bólingen qarjyny jyl sońyna deıin tolyǵymen ıgeretin bolady. Aqmola, Aqtóbe, Atyraý, Ońtústik Qazaqstan oblystarynda jáne Almaty men Astanada qarjy túgeldeı ıgerilgen.
