Bıyl Jol kartasy aıasynda qansha jumys orny qurylady

NUR-SULTAN. QazAqparat - 2020-2021 jyldarǵa arnalǵan Jumyspen qamtý jol kartasy (JQJK) aıasynda bıyl 331 joba iske asyrylatyn bolady. 2021 jyly barlyǵy 27,3 myń jumys ornyn qurý josparlanyp otyr, onyń 10,2 myńy turaqty jumys orny bolady, dep habarlaıdy QazAqparat.

«Budan basqa, 2020 jyly iske qosylǵan 259 jobany iske asyrý jalǵasýda, onyń aıasynda 81 myńǵa jýyq adam jumysqa ornalastyryldy», - delingen Eńbek mınıstrligi málimetinde.

Іske asyrý tájirıbesin eskere otyryp, JQJK-ǵa taldaý júrgizildi jáne mynalardy kózdeıtin jańa tásilder ázirlendi:

– jańa turaqty jumys oryndaryn qurý úshin azamattardyń kásipkerlik bastamalaryn keńeıtý;

– otandyq taýarlar óndirisin, qyzmetterdi damytý jáne jumys oryndaryn qurý úshin «Bastaý Bıznes» jobasy túlekteriniń bıznes-josparlaryn qarjylandyrýdyń (mıkrokredıtteýdiń) qoljetimdiligin arttyrý;

– JQJK-ǵa qurylys-montajdaý jumystary aıaqtalǵannan keıin turaqty jumys oryndaryn qurýdy qamtamasyz etetin áleýmettik-mádenı, ınjenerlik-kóliktik, óndiristik (ındýstrııalyq) ınfraqurylymdy jáne turǵyn úı-kommýnaldyq sharýashylyq obektilerin salý ári rekonstrýktsııalaý jónindegi jobalardy ǵana qosa otyryp, ınfraqurylymdyq jobalardy irikteý krıterıılerin qaıta qaraý.

Esterińizge sala keteıik, 2020 jyly JQJK aıasynda 239 myńnan astam jumys orny quryldy, onyń 6,6 myńy – turaqty. Bul rette jumysqa ornalastyrylǵan azamattardyń 50,3 paıyzy halyqty jumyspen qamtý ortalyqtary arqyly jumys tapty, 6,5 myń ınfraqurylymdyq joba iske asyryldy. JQJK ınfraqurylymdyq jobalaryn iske asyrýdyń erekshe sharty - otandyq óndirýshilerdiń taýarlary men qyzmetteriniń keminde 90 paıyzyn qoldanýdy qamtamasyz etý. Qyzmetkerlerdiń keminde jartysyn halyqty jumyspen qamtý ortalyqtary arqyly jaldaıdy, jumyssyz jastarǵa basymdyq beriledi. Merdigerler sanıtarlyq-epıdemıologııalyq sharalardy qoldana otyryp, qaýipsiz eńbek jaǵdaılaryn qamtamasyz etýge tıis.