Bıyl jol bıtýmyn otandyq óndirýshiler tolyqtaı qamtamasyz etedi

ASTANA. QazAqparat - Qazaqstannyń jol qurylysyndaǵy mekemeler tolyqtaı sapasy joǵary otandyq jol bıtýmyn paıdalanyp jatyr. Bul týraly «QazAqparat» agenttiginiń resmı saýalyna QR Energetıka mınıstrliginen habarlandy.

«Aǵymdaǵy jyldyń 8 aıy ishinde barlyq otandyq jol bıtýmyn óndirýshiler 370 myń tonna bıtýmdy shyǵardy, al bıylǵy qajettilik 429 myń tonnany quraıdy. Jyldyń sońyna deıin jol bıtýmyna qajettilik otandyq óndirýshilermen tolyq qamtamasyz etiletin bolady», - delingen mınıstrlik málimetinde.

Aıta keteıik, budan buryn respýblıkada (2014 jylǵa deıin) jol bıtýmy qajettiliginiń jartysy ımporttalatyn bolatyn.

Aqtaý bıtým zaýyty paıdalanýǵa berilgennen keıin, barlyq otandyq jol bıtýmyn óndirýshiler («CaspiBitum» BK» JShS, «PMHZ» JShS, «Gazpromneft-Bıtým Qazaqstan» JShS, «Asfaltobeton zaýyty» JShS) ishki naryqty tolyqtaı jol bıtýmymen qamtamasyz etti. 2014 jyly respýblıka boıynsha 546,6 myń tonna jol bıtýmy óndirildi, al jyldyq qajettilik 515 myń tonnany quraǵan bolatyn.

Esterińizge sala keteıik, ımportty almastyrý jáne ishki naryqty otandyq bıtýmmen qamtamasyz etý maqsatynda 2010-2014 jyldary Qazaqstanda Údemeli ındýstrııalyq-ınnovatsııalyq damytý memlekettik baǵdarlamasy aıasynda 2010 jyly quny 290 mln. AQSh dollaryn quraıtyn «Caspi Bitum» otandyq iri zaýyt salý jumysy bastaldy. 2013 jyldyń jeltoqsanynda zaýyt paıdalanýǵa berilip, 2014 jyldyń basynan bastap «Caspi Bitum» BK» JShS elimizdiń batys óńirin (Atyraý, Aqtóbe, Mańǵystaý, Batys Qazaqstan oblystaryn) jol bıtýmymen qamtamasyz etýde.